Өрөспүүбүлүкэ үрдүнэн дьуһуурунай оҕо саадтара үлэлии олороллор. Дьокуускай куоракка икки – «Искорка» уонна Сыырдаах сэлиэнньэтигэр баар уһуйаан үлэлии тураллар.
Дистанционнай үөрэх оскуолаларга эрэ барар буолбатах. Уһуйааннар эмиэ кыах баарынан үлэлии олороллор. Санаан көрдөххө, дьикти. Ама, оскуола курдук, зум нөҥүө оскуолаҕа киирэ илик саастаах оҕолору дьарыктыаҥ дуо?
Уһуйаан иитээччилэрэ харантыын, дистанционнай үлэлэрин туһунан кэпсииллэр.
Анна Дьяконова, Дьокуускай куораттааҕы “Ромашка” уһуйаан орто бөлөҕүн иитээччитэ:
— Коронавирустан сылтаан пандемия үгүс дойдуну хапта, үлэлэригэр-хамнастарыгар уларыйыылары киллэрдэ. Уһуйаан үлэтэ эмиэ дистанционнай үөрэххэ көстө. Иитиллээччилэрбитин, төрөппүттэрбитин кытта сибээспитин быспат туһуттан, күн аайы сорудах ыыта олоробут. Ону таһынан араас күрэхтэри тэрийэн ыытабыт. Холобур, аан дойду үрдүнэн Кинигэ күнүн бэлиэтээн, оҕо төрөппүтүн кытта кырачаан кинигэни оҥорон, дьиэ иһигэр оҕо муннугар кинигэлээх быыстапката тэриллибитэ. Улуу Кыайыы 75 сылын көрсө хоһоон уонна уруһуй күрэҕэ ыытыллыбыта. Барыта дистанционнай. Нэдиэлэ бүтүүтэ оҕолор оҥорбут сорудахтарын видеороликка түмэн иһэбит. Маны таһынан, оҕолорбутун кытта Бүтүн Арассыыйатааҕы дистанционнай күрэхтэргэ эмиэ хото кыттабыт. Бу күннэргэ үөрүүлээх сонун кэллэ – Бүтүн Арассыыйатааҕы уруһуй куонкуруһугар иккитэ бастаатыбыт. Биһиги, иитээччилэр, эмиэ дьиэҕэ олорон хаалбакка, бэйэбитин сайыннарарга дьулуһабыт. Ол курдук, араас вебинар нөҥүө ыытыллар күрэхтэргэ, үөрэхтэргэ, сэминээрдэргэ кыттабыт. Үөрэхтээһин сайтарыгар үлэлэрбитин тиһэн, суруйан ыытабыт. Ити курдук. Дьиэҕэ да олорорго күһэлиннэрбит, кылаабынайа, оҕолорбутун кытта сибээспитин тутан, маны сэргэ үлэбитин саҥалыы наардаан үлэлии-хамсыы сылдьабыт.
Марияна Слепцова, Үөһээ Дьааҥы Арыылаах оҕо саадын иитээччитэ:
— Харантыын буолан, үлэбитигэр уларыйыылар киирдилэр. Уһуйааммыт сабыллан, дьиэттэн үлэлииргэ күһэлиннибит. Биһиги дьыссаакка уопсайа 43 оҕо баар. Харантыын саҕаланыаҕыттан иитиллээччилэрбитин араас дистанционнай куонкурустарга, күрэхтэргэ актыыбынайдык кытыарабыт. Улуус да киэнигэр, өрөспүүбүлүкэ да күрэхтэригэр, бэл, Арассыыйатааҕы, аан дойдутааҕы олимпиадаларга, куонкурустарга анньыһан иһэбит. Оҕолору төлөпүөн нөҥүө көҕүлүүбүт, дьарыктыыбыт. Бэйэбит эмиэ уһуйаан үлэһиттэрин тэрээһинигэр хото кыттабыт. Дистанционнай үлэ үчүгэйэ диэн оҕолорбут үлэлэрин ыраах ыытан кытыарарга кыах бэриллэр эбит. Хас да күрэххэ кыттан, миэстэлэстибит. Онон ыраахтан үлэ бэйэбит үлэбитин көрдөрөргө, билиһиннэрэргэ туспа көмөлөөх. Куһаҕана диэн, биллэн турар, оҕону кытта алтыһыы суох. Оттон чуолаан дистанционнай дьарык үчүгэй хаачыстыбалаах буолуоҕун Интернет бытаана харгыстыыр.
Надежда Сидорова, Дьокуускай куораттааҕы «Остров сокровищ» уһуйаан иитээччитэ:
— Оскуолалар тэҥэ биһиги уһуйааммыт эмиэ дистанционнай үөрэхтээһиҥҥэ көспүтэ. Уратыта диэн, оскуолалар курдук, сорудаҕы хайаан да толоруохтааххын диэн модьуйар бырааппыт суох. Билигин төрөппүттэргэ уустук кэм. Оскуола оҕолордоох төрөппүттэр учуутал оруолун ылан, оҕолорун кытта тэҥҥэ үлэлииллэрэ баар суол. Ол да буоллар, нэдиэлэ аайы бырагырааманан былаан оҥорон, күн аайы оҕолорбутугар сорудах ыытабыт. Маны сэргэ дистанционнай куонкурустарга кыттабыт. Педагогтары эбии үөрэхтээһиҥҥэ, идэни тупсарыыга, сайыннарыыга ылсан, араас вебинардарга, куурустарга үөрэнэбит. Уһуйааммыт инстаграмыгар араас куонкурустары тэрийэн ыытабыт, оҕолор оонньууну, дьарыктарын бэйэ-бэйэлэрин кытта үллэстэллэр. Онон бииргэ сылдьар оҕолорун, баспытааталларын куруук көрө сылдьаллар, сибээспит быстыбат.
Туйаара Петухова, Дьокуускай куорат «Ромашка» уһуйаанын иитээччитэ:
— Улуу Кыайыы 75 сылыгар аналлаах тэрээһиннэргэ улахан болҕомто ууран иитиллээччилэрбитин кытыардыбыт. Ол курдук, биһиги, иитээччилэр, оҕолорбутун кытта сэрии туһунан хоһоон ааҕан уонна эһэлэрбит хаартыскаларын тутан, “Өлбөт үйэлээх полк” видео устан таһаардыбыт. Оҕолор, төрөппүттэр бары көхтөөх кыттыыны ыллылар. Түгэнинэн туһанан, барыларыгар улахан махталбытын биллэрэбит! Хас биирдии киһи бу улуу күн суолтатын өйдүөхтээх, билиэхтээх уонна сыаналыахтаах. Ол, мин санаабар, кыра эрдэхтэн, дьиэ кэргэнтэн, уһуйаантан саҕаланар. Итиэннэ биһиги саха уһуйаана буоларбыт быһыытынан, өрөспүүбүлүкэбит күнүгэр иитээччилэр, оҕолор төрөппүттэрин кытта саха былааҕын уруһуйдаан, сыһыаран оҥорон челлендж устубуппут. Төрөөбүт дойдуга таптал кыраттан саҕаланар – дьиэ кэргэнтэн. Ол иһин бу нэдиэлэҕэ Дьиэ кэргэн күнүн көрсө «Иллээх дьиэ кэргэн» диэн бырайыак ыытан эрэбит. Төрөппүттэр оҕолорун кытта тэҥҥэ дьиэлэригэр сөбүлүүр дьарыктарын, холобур, ас астааһынын, спордунан дьарыктаныыларын уо.д.а. видеоҕа устан ыыталлар. Бу дьиэ кэргэни түмэр сыаллаах тэрээһин буолар. Дистанционнай үлэ уратыта диэн билиҥҥи олох сайдыытынан араас технологиялары туттан үлэлиибит. Ол кэм ирдэбилэ буолуон сөп.
Ити курдук уһуйааннар үлэлэрэ харантыын кэмигэр тохтообот. Өрөспүүбүлүкэ араас муннугар бары да биир тэҥник үлэлии-хамсыы сылдьаллар эбит.
-
0
-
0
-
0
-
0
-
0
-
0
