Михаил Сивцев этэринэн, быйыл Роспотребнадзор этиилэригэр сөп түбэһиннэрэн, коронавирус ыарыыта тарҕаныытын усулуобуйатыгар эксээмэни уонна түмүктүүр аттестацияны ыытыыга 1,5 м (ол эбэтэр аудиторияҕа 5-10 кыттааччылаах) социальнай дистанцияны тутуһуллара хааччыллыахтаах.
«Эксээмэни ыытар аудиторияҕа биир тэҥ дезинфекциялыыр сириэстибэлэринэн, рецкулятордарынан, ыраахтан кэмниир термометрдарынан, салгыны ыраастыыр анал аппарааттарынан, антисептиктаах дозатордарынан, анал көмүскэнэр суурадаһыннарынан, ууну хааччыйар тэриллэринэн уонна ыстакааннарынан хааччыллыахтаахтар. Эксээмэн иннинэ уонна ыытыллыбытын кэннэ Саха сирин бары БКЭ пууннарыгар генеральнай ыраастаныы үлэлэрэ тэриллиэхтээхтэр", - диэтэ СӨ Үөрэҕин уонна наукатын миниистирэ.
Ону таһынан СӨ Бырабыыталыстыбатын бэрэссэдээтэлин солбуйааччы Сергей Местников муниципальнай оройуоннарга коронавирус ыарыыта тарҕаныытын балаһыанньата хонтуруолга ылыллыахтааҕын бэлиэтээтэ.
«Бэс ыйын 29 күнүгэр Саха сиригэр оҕо кыттыыта суох БКЭ систиэмэтин уонна пууннар үлэһиттэрин үлэлэрин бэрэбиэркэтэ ыытыллыаҕа. Биһиги сорукпут - БКЭ ыытарга куттал суох буолуу усулуобуйатын эрдэттэн тэрийэн хааччыныахтаахпыт», - диэтэ Сергей Местников.
Бэлиэтээн эттэххэ, судаарыстыбаннай аттестацияҕа сыһыаннаах тэрийии уонна ыытыы бары ыйытыктарга «БКЭ итии линията» («горячая линия ЕГЭ») тэрилиннэ - 42-10-36, 8(924) 599-32-12.
Санатар буоллахха, от ыйын 3 күнүгэр бастакы эксээмэннэр буолуохтара — географияҕа, литератураҕа уонна информатикаҕа. От ыйын 6-7 күннэригэр нуучча тылыгар, от ыйын 10 күнүгэр математикаҕа, от ыйын 13 күнүгэр историяҕа уонна физикаҕа, от ыйын 16 күнүгэр обществознаниеҕа уонна химияҕа, от ыйын 20 күнүгэр биологияҕа буолуоҕа. Ону кытта от ыйын 20 күнүгэр омук тылыгар суругунан эксээмэни, от ыйын 22-23 күннэригэр омук тылыгар тылынан эксээмэни туттарыахтара. Резервнэй эксээмэннэр от ыйын 24-25 күннэригэр ыытыллара былааннанар. Убаастанар биричиинэнэн БКЭ-ни туттарбатах оҕолор атырдьах ыйыгар туттарыахтара.
- 0
- 0
- 0
- 0
- 0
- 0