Бу тэрээһин тоҕо, туох сыаллаах ыытылларын пуорум координатора, Саха гимназия учуутала Степан Ноевтан ыйыталастым.

- Аан дойдуну атыйахтыы аймаабыт пандемия олохпутугар уларыйыылары киллэрдэ. Экэниэмикэ, олох-дьаһах бары эйгэтэ улахан охсууну көрүстэ. Ол кэмҥэ олорон хаалар табыллыбат. Төһөнөн ыксаллаах, ыгым кэм тирээтэҕинэ, өйбүтүн-төйбүтүн булунар, бары кыахпытын арыйар наадатын бары өйдүөх тустаахпыт. Ол иһин пуорум слогана «Кризис –время возможностей» диэн. Кириисис кэмигэр саҥа саҕахтары арыйар, сатабылгын сайыннарар уонна олоҕу кытта тэҥҥэ хардыылыыр кэрэх. Бу тэрээһин онно төһүү буолуохтаах. Өрөспүүбүлүкэҕэ инники күөҥҥэ үлэлии сылдьар дьоммут ыччакка бэйэлэрин үөрүйэхтэрин үллэстэр, санаа атастаһар былаһааккалара тэриллэр. Пуорум уопсайа 5 бырагырааманан үлэлиэҕэ:

• 14.00-15.00 «Ыччат кэм уларыйыытыгар» («Молодёжь в условиях новых реалий»).
• 15.00-16.00 «Бэйэни сайыннарыы саҥа саҕахтара» («Новые форматы для самообразования»).
• 16.00-17.00 «Пандемия уонна цифровизация» («Пандемия и цифровизация»).
• 17.00-18.00 «Бэйэ суолун хайдах булуохха сөбүй?» («Как найти свое предназначение?»).
• 18.00-19.00 «Киһи кыаҕа муҥура суох” («Жизнь без границ»).

Бу былаһааккалар бары ZOOM нөҥүө бараллар. Билигин быһа холоон хас биирдии былаһаакка аайы 50-ча киһи регистрацияланна. Ыччаттары сэргэх кэпсэтии, сүбэ-ама күүтэр.

Дьон-сэргэ, ордук ыччат уруккунан олорон хаалбакка, кэм уларыйыыларын кытта тэҥҥэ хардыылыыр кэмэ үүннэ. Үрдүк үөрэх дипломун туттум да үөрэнэн бүтэбин диэн төрүт сыыһа санаа. Киһи күннэтэ билиитин-көрүүтүн хаҥата, кэмиттэн-кэмигэр идэтин үрдэтинэ сатыахтаах. Олохпут тэтимэ оннукка күһэйэр.