Бу саҥа тутуллубут, Уһук Илиҥҥэ суох үчүгэй оҥоһуулаах, оҕо сайдарыгар бары өттүнэн табыгастаах, көмпүүтэринэн, араас аныгы тиэхиньикэнэн толору хааччыллыбыт, оннооҕор бассейннаах оскуолаҕа өй-билии өттүнэн дэгиттэр оҕолор үөрэниэхтэрэ. Оскуола тутуутун, төһө бэлэмин көрө, Ил Дархан Айсен Николаев тиийэ сырытта.
"Манна үөрэммиттэр чиҥ билиини ылыахтара, бэйэлэрэ талбыт предметтэрин дириҥэтэн үөрэтиэхтэрэ. Иккиттэн элбэх омук тылын баһылыахтара. Төрөөбүт тылларын эмиэ үөрэтиэхтэрэ. IT-технологияҕа, программированиеҕа, научнай-чинчийэр үлэлэргэ болҕомтону ууруохпут. Өй-санаа, билии-көрүү, эт-хаан, майгы-сигили өттүнэн эргиччи сайдыылаах дэгиттэр дьону бэлэмнээн таһаарар соруктаахпыт", -- диир оскуола дириэктэрэ Сардаана Татаринова.
VII, VIII, X кылаастарга 60-нуу оҕону сүүмэрдиэхтэрэ. Сэттистэргэ 208, ахсыстарга 206, онустарга 231 сайаапка киирбит. Сайабылыанньаны тутуу бэс ыйын 29 күнүттэн саҕаламмыта уонна от ыйын 20 күнүгэр түмүктэммитэ. Тургутуулар атырдьах ыйын 3-9 күннэригэр буолуохтара. VII-VIII кылаастар ангылычаан тылын, математиканы уонна естествознаниены туттарыахтара. Онустар ахсааны, омук тылын таһынан, үһүс эксээмэннэрэ бэйэлэрин профильнай предметтэринэн буолуоҕа. Ол эбэтэр информатика, физика, история, химия -- мантан талаллар.
- 0
- 0
- 0
- 0
- 0
- 0