Лааҕыр үлэтин үүннээн-тэһииннээн Ил Түмэн дьокутаата Мария Христофорова тэрийэн үлэлэттэ. Уопсайа отут оҕо талыллан, лааҕырга босхо үөрэннилэр.

«Sitim Skills» үөрэх лааҕыра уон күн устата үлэлээтэ. Манна араас хабааннаах билии, сайдыы куурустара ыытылыннылар. Омук тылынан саҥарарга, хаартыскаҕа түһэрэ, видеоҕа уһула үөрэннилэр. Араас минньигэс ас астааһыныгар, утах оҥорорго холоннулар. Алюминиевай боробулуохаттан кэрэ быһыылаах-таһаалаах киэргэллэри оҥорууга сэргэх куурустар буоллулар. Оҕолору талааннаах тарбахтаахтар, араас идэҕэ исписэлиистэр уһуйдулар.

Маны таһынан лааҕыр үөрэнээччилэригэр «Айгуль» хампаанньа көмөтүнэн бородуукта, ас-үөл арааһын түҥэтэн, төрөппүттэр махталлара муҥура суох.

Онлайн лааҕыр билиҥҥи уустук кэмҥэ олус туһалаах, саҥа, сонун хамсааһын буолар. Маннык тэрээһин оҕолору түмэр, талааннарын арыйар ураты айылгылаах.