--Бигэргэммит сокуоннарга үөрэнээччилэри итии аһынан хааччыйыы, тыа сиригэр үлэлиир педагогтар дьиэлэрин-уоттарын төлөбүрдэрин уйунуу, оскуола оптуобуһунан босхо тиэйии, сынньатар-чэбдигирдэр лааҕырдарга табыгастаах усулуобуйаны тэрийии, кылаас салайааччы-тыгар эбии төлөбүрү көрүү, култуурунай тэрээһиннэр билиэттэрин атыылааһын бэрээдэгин олохтооһун, о.д.а. боппуруостары чопчулаатыбыт. Быйыл оскуола иннинээҕи үөрэхтээһин 100 сылын туолла. Онон бастыҥ иитээччилэргэ бэриллэр граннар үптэрин өрөспүүбүлүкэ бүддьүөтүттэн көрөллөрүн ситистибит.Информационнай технология сайдан, быыбардааччыларбын кытта онлайн киэбинэн сибээстэһэбин.

Мин Үөһээ Бүлүү, Горнай улуустарыттан талыллыбыт дьокутаат буоламмын, ити оройуоннар социальнай-экэнэмиичэскэй сайдыыларын сүрүннэһэбин. 2021 сылга Бэрдьигэстээххэ Манчаары оонньуулара, 2022 с. Үөһээ Бүлүүгэ Олоҥхо ыһыаҕа ыытыл-лыахтара, онон туруорсарым, үлэлэһэрим элбэх. Биһиги парламеммыт көҕүлээбит “Аартыка оҕолоро” бырагыраа-мабытын федеральнай таһымҥа өйөөтүлэр. Өссө биир ситиһиибит – Аартыка норуоттар икки ардыларынааҕы оскуолата аһылынна. Хоту дойдуну каадырынан хааччыйыы боппуруоһун Аартыка форумугар эмиэ көтөхтүм. Төрүт олохтоох ыччаты миэстэтигэр идэҕэ уһуйуу, «Земскэй учуутал» бырайыак балаһыанньатыгар эдэр исписэлиис ананан барар сирин уратытын, норуотун култууратын, тылын, саатар, удумаҕалатан билэрэ булгуччулаах буоларын, көс оскуолаларыгар цифровой эйгэни тэрийии, о.д.а. туһунан этиилэрбин сэҥээрдилэр, киин бэчээт таһаарыы-ларыгар сырдаттылар.Мэдиссиинэ национальнай киинигэр «УчимЗнаем» диэн үөрэтэр-ин-новационнай былаһаакканы тэрийэллэрин көҕүлээтим. Манна уһун кэмҥэ балыыһаҕа сытар оҕолор оскуолатааҕы бырагырааманан толору үөрэнэр кыахтаннылар. Өйүнэн мөлтөх оҕолорго анаммыт «Специальная Олимпиада России» уопсастыбаннай хамсааһыҥҥа кыттыһаммын, эрэгийиэннээҕи салаатын салайабын. Ол курдук, «Юнифайд-спорт» бырагырааманан спортсменнар оҕолору эрчийэллэр. Мин бу үлэлэри барытын соҕотох иилиир-саҕалыыр буолбатахпын, күүс-көмө, сүбэ-ама буолар дьоммор махтанабын. Наука уонна техно-логия сылыгар өссө далааһыннаахтык үлэлиэхпит, барыгытын Саҥа дьылынан, -- диир Феодосия Габышева, Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ.