Муус устар 6 күнүттэн Дьокуускай куоракка оҕону сынньатар уонна чэбдигирдэр «Сосновый бор» кииҥҥэ оҕо уопсастыбаннай хамсааһынын салайааччыларын түмэр «Сила.КОМ» диэн форум саҕаланна.
Тэрийээччилэр иһитиннэрбиттэринэн, 20 улуустан уонна куорат уокуруктарыттан 100-чэкэ тэрийээччи-педагог кэлбит. Тэрээһин кыттыылаахтара үөрэх кууруһун ааһалларын таһынан, араас көрсүһүүлэргэ, маастар-кылаастарга, бырайыактарынан үлэҕэ кыттыахтара, сайдыыга туһаайан, санааларын үллэстиэхтэрэ, хас да тиэмэнэн кэпсэтиини тэрийиэхтэрэ.
Форум болҕомтотун киинигэр «Бастыҥ баһаатай» куонкурус киирбит. Быйылгы күөн күрэскэ илин-кэлин түсүһэр баҕатын 11 улуустан 12 баһаатай биллэрбит. Ол аата форум кыттыылаахтара бастыҥнары көрөн, кинилэр уопуттарын иҥэринэн, үлэлэрин-хамнастарын байытынар кыахтаныахтара.
«Быйыл кыттааччылар хаһааҥҥытааҕар да ордук бэлэмнээх кэлбиттэр. Маныаха улуустааҕы сүүмэрдиир түһүмэҕи тэрийии улахан көмөлөөх. Куонкурус түһүмэхтэрэ педагог билиитин эрэ буолбакка, сатабылын, дьоҕурун, тус уопутун кэтээн көрөр сыаллаах. Онон, кырдьык ,дьиҥ педагог маастарыстыбатын баһылаабыт эрэ буоллаххына инники күөҥҥэ тахсаҕын», – диэн бэлиэтиир дьүүллүүр сүбэ бэрэссэдээтэлэ, «Юные якутяне» өрөспүүбүлүкэтээҕи тирэх киин методиһа Александр Васильев.
Кыттааччылар 4 түһүмэҕинэн тургутууну ааһыахтара, ол эбэтэр «Бэйэни билиһиннэрии», «Тус уопуту көрдөрүү», «Маастар-кылаас», «Уустук балаһыанньаттан тахсыы». Куонкурус түмүгүнэн Гран-при, I, II, III истиэпэннээх дипломаннар ааттаныахтара, анал ааттар хаһаайыннара биллиэхтэрэ.
Үгэскэ кубулуйбут тэрээһини иилээн-саҕалаан тэрийэллэр: «Юные якутяне» өрөспүүбүлүкэтээҕи тирэх киин, СӨ оҕолорун уопсастыбаннай холбоһуктарын сойууһа. Куонкурус СӨ Үөрэҕин уонна наукатын министиэристибэтин, СӨ Ыччат дьыалатыгар уонна социальнай коммуникацияларга министиэристибэтин өйөбүлүнэн, С.Н. Донской-II аатынан үөрэх сайдыытын уонна идэни үрдэтэр институт кыттыытынан ыытыллар.
«Юные якутяне» өрөспүүбүлүкэтээҕи тирэх киин
пресс-сулууспата,
төл. 319-320
-
0
-
0
-
0
-
0
-
0
-
0
