Университет Саха судаарыстыбаннай педагогическай институтун оннугар тэриллибитэ. 

Бүгүн Максим Аммосов аатынан Хотугулуу-Илиҥҥи федеральнай университет төрүттэммитэ 65 сылын бэлиэтиир. Үөрүүлээх күнүнэн устудьуоннары, бүтэрбиттэри уонна преподавателлэри университет ректора Анатолий Николаев эҕэрдэлиир:

«65 сыл анараа өттүгэр бу күнтэн өрөспүүбүлүкэ сайдарыгар тосхол уурбут Саха сирин бастакы университетын баай устуоруйата саҕаламмыта. Университеппыт үрдүк үөрэх дьоҕус кыһатыттан Уһук Илиҥҥэ уонна Арассыыйа Аартыкатын түөлбэтигэр  биир саамай улахан научнай кииҥҥэ тиийэ үүннэ. Биһиги университеппыт аата-суола Арассыыйаҕа да, тас дойдуларга биллэр».

Университет утумнаах үлэтин түмүгэр тас дойдулар үөрэхтэрин кыһаларын кытары сыһыан олохтоммут.

«Университет сайдарыгар хайысхалаабыт бастакы ректорга – Авксентий Егорович Мординовка -- уонна бары салайааччыларга махталбыт улахан. Кинилэр сүрэхтэрин ууран туран, университет үлэтэ көдьүүстээх буоларыгар кыһаллан үлэлээбиттэрэ», -- диэн Анатолий Николаев бэлиэтээн эттэ.