Саха сириттэн Владислав Бурнашев диэн Саха сирин оҕолорун сэбиэтин бэрэссэдээтэлэ, Мииринэйдээҕи оҕо уопсастыбаннай түмсүүтүн салайааччыта, Политехническэй лиссиэй 10 кылааhын үөрэнээччитэ кытынна. Владислав улууһугар да, өрөспүүбүлүкэ да эргимтэтигэр араас тэрээһиннэри көҕүлүүр, тэрийсэр буолан олус боччумнаах, сэргэх толкуйдаах.
Кини дойду салайааччытыгар Владимир Владимировичка Саха сиригэр өрө турбут баһаардары үмүөрү тутарга киинтэн улахан өйөбүл оҥоһуллубутун бэлиэтээн туран, президент болҕомтолоох сыһыанын иһин махталын биллэрдэ. Итиэннэ «АЛРОСА» хампаанньа Саха сирин сайдыытыгар кыһамньылаах сыһыанын, регион уонна оруойуон бюджета туолуутугар улахан суолталааҕын бэлиэтээтэ.
«Мииринэйгэ үгүс дьиэ кэргэн олоҕо төрүт хампаанньаны кытта быһа ситимнээх. Биһиги эһэлэрбит, эбэлэрбит, төрөппүттэрбит бары кэриэтэ үлэлиир буолан интэриэспит улахан. Кэлиҥҥи кэмҥэ синтетическэй алмаас айыллан, айылҕа баайын үтүрүйүөх куттала үөскээтэ», – диэн саха ыччата долгуйуутун биллэрдэ.
Салгыы Владислав Мииринэйгэ региональнай техническай колледж нефть промышленноhын хайысхатыгар каадырдары бэлэмниир үлэни тэрийэн эрэрин, маныаха Саха сиригэр үлэлиир баараҕай хампаанньалар өрөспүүбүлүкэ олохтоохторун, ордук ыччат дьону, ыҥырбаттарын үрдүкү салалта болҕомтотугар таhаарда.
«Баҕар, Сахабыт сиригэр бу эйгэҕэ үрдүк таhымнаах каадырдары бэлэмниир тиhик олохтоно илигиттэн буолуо. Ол эрэн ыччат төрөөбүт түөлбэтигэр олохсуйуон, айыан-тутуон баҕарар. Оччотугар аныгылыы тииптээх үөрэх кыһатын тэрийэр, биитэр университекка туспа салааны арыйар наада курдук», – диэн баҕа санаатын эттэ.
«Тэрийэр, сайыннарар наада. Саха сиригэр эрэ буолбакка, атын да регионнарга, киин куораттарга араас үөрэх кыһалара, научнай кииннэр бааллар эрээри, онно үөрэммит ыччаттар бэйэлэрин регионнарыгар төннөллөр дуо диэн баар? Дьиҥэ, каадырдар миэстэтигэр наада буоллахтара», – диэн Владимир Путин сөпсөһөрүн биллэрдэ.
Аҕа баһылык орто уонна үрдүк үөрэхтэргэ бюджеттан үбүлэнэр миэстэлэри тыырыыга регионнарга биэрэр курдук быһаарынан олоробут диэтэ. Бу дьаһал миэстэтигэр үөрэх хаачыстыбата үрдүүрүгэр, итиэннэ төрөөбүт түөлбэлэригэр олохсуйуон баҕалаах ыччаттарга кыаҕы үөскэтэрэ саарбаҕа суох. Манна эбэн Владимир Путин ситимҥэ холбоһон араас үөрэх ньымаларын тобулуохха сөбүн ыйда. Оччотугар Саха сиригэр олорон бөдөҥ үөрэх кыһаларын чиҥ билиилэрин сомсуохха, хайысхалаах дьарыктарын ылыныахха сөп.
Түмүккэ, дойду президенэ Саха сиригэр турбут баһаар уотун умуруорууга кыттыспыт бары дьоҥҥо, ордук баҕа өттүнэн дойдуларын көмүскүүргэ туруммут олохтоохторго махталын биллэрдэ. Ыарахан балаһыанньаттан чаҕыйан турбат дьон элбэҕэ, кинилэр ордук хорсун хаачыстыбаларын көрдөрбүттэрэ ураты болҕомтоҕо киирэрин бэлиэтээтэ. Баһаартан эмсэҕэлээбиттэргэ салгыы да көмө баар буолуо диэн эрэннэрдэ.
- 0
- 0
- 0
- 0
- 0
- 0