Ол курдук, Арассыыйаны кытта ыкса кыраныыссалаһа сытар Хэйлуцзян провинциятыгар атын сиртэн киирии-тахсыы тохтоото. Кыраныыссаны суукканы эргиччи харабыллыахтара. Бу провинцияны коронавирус иккис долгуна таарыйда. Харбин куоракка COVID-19 инфекциянан ыалдьыбыт киһи ахсаана үрдээн, итинник кытаанах миэрэни ылынарга күһэлэннилэр. Кэлиҥҥи уон күҥҥэ барыта 57 киһи ыалдьыбыта бэлиэтэммит.
Харбин куорат Кытай хотугу киин куоратынан билиниллэр. Арассыыйа үс регионун: Приморскай кыраайы, Еврейскэй автономнай уокуругу уонна Амур уобалаһын кытта кыраныыссалаһар. Бу бөдөҥ мегаполиска 10 мөл. киһи олорор.
Бу куорат олохтоохторо олорор дьиэлэриттэн тахсалларын наадатыгар, коронавируһунан ыалдьыбатахтарын бигэргэтэр QR-код ылаллара ирдэнэр. Маны таһынан уулуссаҕа уонна уопсастыбаннай миэстэлэргэ маасканы хайаан да кэтиэхтээхтэр.
Ити иннинэ муус устарга Харбиҥҥа сүүрбэ аҕыс хонуктаах харантыын биллэриллэ сылдьыбыта. Билигин Кытай аан дойдуга коронавируһунан ыалдьыбыт киһи ахсаанынан аан дойдуга тохсус миэстэҕэ сылдьар.
- 0
- 0
- 0
- 0
- 0
- 0