Биэнсийэ индексацияланыаҕа

Сокуоннай саастарын ситэ илик оҕолорго эппэкиин, көрөөччү-истээччи быһыытынан сылдьар дьон страховой биэнсийэлэрэ индекцацияланан кэлиэҕэ. «Бу тулаайах хаалбыт оҕолору көрө-истэ сылдьар эбэлэргэ-эһэлэргэ, атын да дьоҥҥо көмө буолуоҕа”, - диэн Госдума Бэрэссэдээтэлэ Вячеслав Володин этэн турардаах.  

30 тыһыынча киһи бу көмөнү туһанар кыахтанар.

Бэйэ дьарыктаах дьоҥҥо туспа эрэсиим

Нолуок сулууспата бэйэ дьарыктаах дьоҥҥо туһаайан чэпчэтиилээх эрэсиими киллэриэн сөп. Манна регионнар бэйэлэрэ сөптөөх сокуону ылыналлара наада.

Санатар буоллахха, бу сокуон уон сыл үлэлиир. Манна бэйэ дьарыктаах, о.э. тус бэйэлэригэр үлэлиир (үлэ биэрээччитэ суох) дьон, холобур, бородууктаны оҥорон таһаарааччы эбэтэр өҥө оҥорор дьон, дохуоттара сылга 2,4 мөлүйүөн солкуобайтан тахсыбат буоллаҕына, нолуогу 4% эбэтэр 6% ставканан төлүөхтэрэ. Бу билиҥҥи нолуок тиһигин 6 бырыһыанынааҕар чэпчэки. Бу сокуон эксперимент быһыытынан киирдэ. Манна ким баҕалаах киирэр. Бу эрэсиим дьон сокуоннайа суох эргинэн ыстараапка түбэспэттэрин туһугар киирдэ.

Бу сокуон бастакы чааһа 2019 сыллаахха Москваҕа, Москва оройуонугар, Калужскай уобаласка уонна Татарстаҥҥа киирбитэ. Саха сиригэр сокуон от ыйыттан үлэлиир. Сорох регионнар эмиэ сыыйа киирэн иһэллэрэ бэлиэтэнэр.

Коллектортан көмүскэллээх буолуохпут

Мантан инньэ коллектор сэрэппэккэ кэлэрэ бобуллар. Ол курдук, коллекторскай сулууспа иэстээх тэрилтэҕэ ирдэбиллээх тиийэрин отут күн инниттэн анал реестр нөҥүө сэрэтэр эбээһинэстээх. Бу сибидиэнньэлэр кредиторга, колекторга уонна чуолаан иэстээх киһиэхэ эрэ көстөллөр.

Инбэлиит буоларгын хос дакаастыыр наадата суох

Судаарыстыбаннай өҥөнү, социальнай көмөнү ыларга мантан инньэ инбэлиит буолары дакаастыыр ыспыраамка ирдэммэт. Маны сэргэ доруобуйатыгар хааччахтаах киһи массыынатын бэйэтин регионуттан тахсар түгэнигэр, босхо парковкалыыр кыахтаах. «Инбэлиит” диэн знак аны суох буолуоҕа. Туох баар дааннайдар инбэлииттэр реестрдарыгар киирэн сылдьар.