Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлэ Владимир Прокопьев сокуон барылын сүнньүнэн санаатын парламент саайтыгар таһаарбыттар. "Бу сыл балаҕан ыйыгар РФ Бэрэсидьиэнэ ойуур салаатын сайыннарыытын боппуруостарынан мунньах ыыппыта уонна этиилэри киллэрбитэ. Бэрэсидьиэн бастатан туран, ойуур маһын туһаныытын салаатыгар ыытыллар үлэ барыта дьэҥкэ көстүөхтээх, мас дэлээнэттэн атыылаһар тэрилтэҕэ диэри хайдах тиэрдиллэрэ биллиэхтээх диэбитэ", -- диэн Владимир Прокопьев этэр.  Ол курдук Ойуур кодексыгар уларытыылары киллэрэр сокуон барылын Госдумаҕа бастакы ааҕыыга көрүөхтэрэ.
2019-2020 сс. ойуур маһын сокуоннайа суох атыылааһын 50 тыһыынча түгэнин тустаах уорганнар бэлиэтээбиттэр. Судаарыстыбаҕа 35 млрд солк. суумаҕа хоромньу оҥоһуллубут. Кистэлэҥ ханаалларынан Кытайга, Японияҕа, Финляндияҕа маһы таспыттар.
“Дьокуускайга 2019 сыл бэс ыйыгар буолбут Национальнай ойуур форумугар ойуур харыстабылын сокуона киэҥник ырытыллыбыта, кэккэ этиилэр киирбиттэрэ. Ол этиилэр сокуон барылыгар киирдилэр. Быйыл сэтинньи 12 күнүгэр Госдума дьокутааттарын бөлөҕө ойуур маһын туһаныытыгар тахсар кэһиилэри туоратар сокуон барылын оҥорон киллэрдилэр”, -- диэн Владимир Прокопьев эппит.