Саха Өрөспүүбүлүкэтин Тутууну уонна дьиэни-уоту кэтээһиҥҥэ судаарыстыбаннай управлениетын салайааччыта Павел Аргунов хоруйдуур:
--РФ Дьиэҕэ-уокка кодексын 44-с ыстатыйатын 2-с пуунун 3-с хос пуунугар этиллэринэн, элбэх кыбартыыралаах дьиэҕэ реклама араас конструкциятын (баннердары, истиэндэлэры, былакааттары, кумааҕы биллэриилэри, уотунан тыгар суруктары, о.д.а) кыбартыыраны бас билээччилэр көҥүллэрэ суох иилиэ да, ыйыа да суохтаахтар.
Лифт иһигэр да буоллун, дьиэ тас өттүгэр да – барыта уопсай мунньаҕынан быһаарыллыахтаах. Реклама миэстэтин хаска арендалыыр, ол харчыны туохха туһанар туһунан олохтоохтор бары бииргэ сүбэлэһиэхтээхтэр. Рекламаттан киирбит үбү УК бэйэтин наадатыгар туһанар бырааба суох, харчы барыта дьиэлээхтэр интэриэстэригэр туһуламмыт дьыалаҕа барыахтаах.
Рекламаны иилэр сөбүлэҥи куоластааһынынан быһааран бигэргэтэллэр. “Сөпсөһөбүн” диэҥҥэ иккинэн-үһүнэн элбэх киһи ууннаҕына, рекламаны иилэллэрэ көҥүллэнэр. Маныаха дуогабары УК бэрэстэбиитэлэ буолбакка, кыбартыыраны бас билээччилэр ааттарыттан биир эмэ олохтоох киһи түһэрсиэхтээх.
Санатан эттэххэ, рекламаны иилии туһунан мунньах барыта боротокуолланыахтаах. Ол боротокуол юридическай өттүнэн күүстээх докумуон буолар.
- 0
- 0
- 0
- 0
- 0
- 0