Эскроу-счет диэн тугуй?

Саҥа сокуонунан, кыбартыыраны атыылаһааччы бааҥҥа анал эскроу-счет арыйтарар. Манна кини үбэ ханна да сүппэккэ, уоруллубакка, тыытыллыбака бүтүн сытар. Дьиэни тутааччы дуогабарга ыйыллыбыт усулуобуйаны барытын толордоҕуна эрэ, ол ууруллубут үбү ылар кыахтаах. Тутааччы хампаанньа дуогабар усулуобуйатын толорботоҕуна, холобура, дьиэни болдьоҕуттан уһуннук туттаҕына эбэтэр эһиннэҕинэ, кыбартыыраҕа харчытын укпут киһи үбүн, эскроусчетуттан ылан, ипотека ылбыт бааныгар төттөрү төнүннэрэр эбэтэр атын кыбартыыраҕа угар.

Абыраллаах пуонда

 Өлүүлээн тутууга кыттыгас (дольщик) уонна тутааччы хампаанньа сыһыаннарын бэрээдэктиир сыалтан 2017 сыллаахха пуонда тэриллибитэ. Бу пуонда тутуллан иһэн тохтообут эбийиэктэри ылан, ситэри тутар, итиэннэ атын элбэх кыбартыыралаах дьиэлэри тутар бырааптаах.

Аны нолуога суох

Дьиэ тутуутугар үптэрин уган баран, ытыс соттубут дьон ночоотторун толуйуу бэрээдэгэ чуолкайдаммыт. Ол курдук, албыннаппыт киһиэхэ харчытын биэрэллэригэр, дьиэ атыытын ырыынагар биир квадрат миэтэрэ сыанатын үс ый иннинэ бэлиэтэммит сыанатынан быһаллар. Бу үп НДФЛ нолуогунан түһэриллибэт. Урут толуйуу төлөбүрүн үбүттэн 13%-нын нолуок быһыытынан төлүүллэрэ.

Дьиэ туһунан толору билиэхтээх

Олохтоох былаас уорганнара хаарбах туруктааҕынан көтүрүллэр эбэтэр хапытаалынайдык өрөмүөннэниэхтээх дьиэлэр тустарынан иһитиннэриини Росреестрга тиэрдиэхтээхтэр. Ханнык баҕарар киһи кыбартыыраны атыылаһарыгар тустаах дьиэ туһунан иһитиннэрии суругу РФ хамсаабат баайын-дуолун испииһэгин (ЕГРН) учуоттуур тэрилтэттэн (Росреестр) көрдүүр бырааптаах.

Былдьаппыт да киһи бырааптаах

Дьиэни атыылаһыы сөбүлэһиитэ сокуоннайынан билиниллибэтэҕинэн, атыыласпыт дьиэлэрин былдьаппыт дьону көмүскүүр сокуон үлэлээтэ. Кинилэр суутунан ночоотторун толуйар төлөбүрү ирдиир бырааптаннылар. Судаарыстыба киһи ороскуотурбут сууматын эбэтэр дьиэ кадастрынан быһыллыбыт сууматын төлүөн сөп. Ону эмсэҕэлээбит киһи бэйэтэ быһаарар.

 Куоластаатахтарына эрэ

Дойду субъектарыгар киирбит территориялары киэҥ хабааннаахтык (комплексно) сайыннарыы мэхэньиисимэ хаарбах уонна саахаланнар туруктаах дьиэттэн көһөрүүнү түргэтитиэҕэ. РФ эрэгийиэннэрэ элбэх кыбартыыралаах дьиэттэн көһөрүүнү эбэтэр өрөмүөннээһини мэктиэлиир бырагырааманы бигэргэтиэх иннинэ олохтоохтор тус санааларын истиэхтээхтэр. Быһаарыыны чуолаан олохтоохтор ылыналлар – уопсай мунньахха, онно дьиэ олохтоохторун улахан аҥаардара кыттыбыт буолуохтаахтар. Дьиэ олохтоохторун 2/3 бырыһыана бырагыраама иһин куоластаатаҕына эрэ, докумуон ылыныллар.