Издательский дом Редакция Подписка
Погода в Якутске: . 32 oC
КУРС ЦБ: $ 72,86 | 88,65

Өрөспүүбүлүкэбит күнүн көрсө итиэннэ Патриотизм сылынан ыйытык ыытарга сананным. Төрөөбүт дойдуга бэриниилээх буолуу диэн хайдах буолуохтааҕый?

Өрөспүүбүлүкэбит күнүн көрсө итиэннэ Патриотизм сылынан ыйытык ыытарга сананным. Төрөөбүт дойдуга бэриниилээх буолуу диэн хайдах буолуохтааҕый?

Саха Өрөспүүбүлүкэтин  VI ыҥырыылаах Ил Түмэнин дьокутаата Геннадий Васильев:

Васильев ГА1

— Төрөөбүт дойдуга бэриниилээх буолуу, мин санаабар, кыраттан саҕаланар. Бастатан туран, бэйэҥ дьиэ кэргэҥҥиттэн. Холобур, эр киһи бэйэтин дьиэ кэргэнин көрө-истэ, харыстыы сылдьарыттан, иитэр-аһатар аналын толору толороруттан саха омук быһыытынан силигилиирэ, инникилээҕэ көстөр. Маны сэргэ төрөөбүт сиргин-уоккун ытыктыыргыттан, төрүт түөлбэҕин кытта ситимҥин быспаккыттан төрөөбүт дойдуга бэриниилээх буоларыҥ саҕаланар.

 Андрей Саввинов, профессор, ХИФУ философияҕа кафедратын салайааччыта:

Андрей саввинов

— Сахалар — аҕыйах ахсааннаах омук. Аҕа дойду сэриитин кэмигэр, аас-туор олохтон хоргуйан, ыалдьан өлбүт саха ахсаана быһа холоон 100 тыһыынча диэн дааннайдар кэпсииллэр. Санаан да көрдөххө, ынырык дии. Бэйэтэ да сэрии иннинэ 300 тыһыынчаттан эрэ тахса киһи баара буолуо. Онтон итиччэ киһини сүтэрии охсуута сүр буоллаҕа. Ол гынан баран итиннэ сыһыаран биири этээри гынабын. Арай, оччолорго биһигини аҕыйах ахсааннаах норуот диэн ойуччу тутан, тыыппакка хаалларбыттара буоллар, биһиги чыҥха атын санаалаах буолуо этибит. Бүтүн дойду дьылҕата быһаарыллар суолталаах кэмигэр кыттыспакка туора турбуппут буоллар, нация быһыытынан бэйэни билиниигэ, патриотизм өйдөбүллэригэр улахан охсууну ылыахпыт этэ. Онон төһө да ыар кэмнэр аасталлар, бу сэриигэ кыттан, улуу омуктары кытта сэргэстэһэ сылдьан, биир санаанан салайтаран, биир өлүүгэ өлөн, буһан-хатан, атын норуоттары кэттэ тэҥҥэ сананар таһымҥа тахсыбыппыт. Бу суолтата, дьиҥин ыллахха, олус улахан.
Иккис түгэн. Сэриигэ элбэх араас омук кытыннаҕа дии. Онтон сиэттэрэн, кистэлэҥ аҥаардаах социологическай дааннайдар бааллар. Охсуһуу хонуутугар өлбүт дьон ахсаанын нэһилиэнньэҕэ сыһыаран көрөллөр. Онно сүрүннээн омук аайыттан 3% буолар эбит, чэ, бэккэлээтэҕинэ, 6%. Холобур, нууччалар киэннэрэ 5,5 %. Оттон, чуолаан, сахалары ылан көрбүттэрэ, быһа холоон, 17% буолан тахсыбыт. Манна, мин санаабар, сахалар кыраҕы харахтаах, чуор кулгаахтаах буолан, саамай эппиэтинэстээх, ыарахан учаастактарга сылдьыбыт буолуохтарын сөп. Дэлэҕэ да, бэргэн ытааччыларбытынан сураҕырыахпыт дуо.
Онон бу ыар кэми, төһө да ыраах олордорбут, чиэстээхтик аһардан, эппитинэн-хааммытынан билэн, тургутууну ааһан, атын омуктартан итэҕэһэ суох сананабыт. Өбүгэлэрбит, эһэлэрбит, эбэлэрбит хара көлөһүннэрин, кыа хааннарын тоҕон, кэнчээри ыччат кэскилин түстээтэхтэрэ дии. Маны кистии-саба тутар наадата суох, аһаҕастык киэн тутта этэрбит оруннаах. Патриотизм диэн итинтэн тахсар.

Надежда Попова, нолуок сулууспатын үлэһитэ:

Надежда попова

— Мин манна биири этиэм этэ. Дойдугуттан атын сиргэ көһөн бардыҥ да, патриот буолан бүтэҕин диэн буолбатах. Атын сиргэ-уокка да сылдьан, эн дойдуҥ бэрэстэбиитэлэ буолаҕын, ону өйдүүр, сыаналыыр, национальнай уратыларгын илдьэ сылдьар буоллаххына, тоҕо патриот буолуоҥ суоҕай? Элбэх тас дойдуга сырыттым. Бэйэм Казахстаннааҕы Норуоттар доҕордоһууларын университетын бүтэрбитим. Үөрэнэр сылларбар үгүс омуктардыын алтыспытым. Омук-омук тус-туспа майгылаах, менталитеттаах буолара биллэр суол. Ол гынан баран төрөөбүт дойдуларын чахчы ытыктыыр омуктары киһи бэлиэтии, убаастыы көрөр. Холобур, туроктары олус патриоттар эбит дии санаабытым. Этэргэ дылы, былаахтарын тэлибирэппитинэн, гимннарын ыллаабытынан сылдьар этилэр. Былаахтарын уһугун ууруулларын дьиктиргии көрбүтүм. Чуолаан Арассыыйа омуктарыттан дагестаннары бэлиэтии көрөөччүбүн. Хаһан да, ханна да буоллаллар бары бииргэ суулаһан сылдьаллар, бэйэ-бэйэлэригэр көмөлөһөллөр, дьоннорун көмүскэһэллэр. Көхсүлэригэр “Дагестан” диэн суруктаах таҥастарын тиирэ кэтэ сылдьааччылар. Киһи сороҕор сонньуйар да буоллар, өрөспүүбүлүкэлэринэн киэн тутталларын, бэйэлэрин национальностарыттан кыбыстыбаттарын бу да көрдөрөр дии саныыбын. Кытайдары ылан көрүөх. Олус элбэх буолан, аан дойдуга тарҕанан олороллор. Хаһан да атын омук тылын, култууратын ылымматтар, симэлийбэттэр. Бэл, астарын-үөллэрин, ырыаларын-тойуктарын илдьэ тиийэн, ханнык да омук сирин муннугар туспа дьаһанан, кытай куоратын, дэриэбинэтин, уулуссатын баар гыммыт буолаллар. Баҕар, ол да иһин итинник санаалаах омук эстибэтэ-быстыбата, ассимиляцияҕа бэриммэтэ буолуо.

Степан Ноев, Саха нацио­нальнай гимназиятын саха тылын учуутала:

Степан Ноев

— Патриот диэн — Ийэ дойдутун хайдах баарынан ытыктыыр, убаастыыр, хараҕын харатын курдук харыстыыр киһи. Дойдутун, дьонун үтүө өрүтүнэн, ситиһиитинэн киэн туттар киһи.  Хас биирдии киһи төрөөбүт сирдээх-уоттаах. Дойдутун туһугар үлэлиир-хамсыыр. Олоҕу биэрбит ийэлээх аҕатыгар, дьиэтигэр-уотугар, тулалыыр дьонугар, айылҕатыгар ураты ытыктабыллаах сыһыаннаах. Онно дьүөрэлии оҕолорун эмиэ иитэр, үөрэтэр.

Николай Тимофеев, ур­баан­ньыт, Татарстан:

WhatsApp Image 2020 04 22 at 16.11.15 копия copy

— Патриот — дойдутугар бэриниилээх киһи. Мин санаабар, төрөөбүт сиринэн киэн туттар, төһө да ыраах сылдьар буолбутун иһин ахтар-саныыр буолуох­таах. Мин бэйэм Казань куоракка үлэлии сылдьабын. Дьон интэриэһиргээн, хантан сылдьаҕын диэн ыйыттахтарына, киэн тутта — «Саха сириттэн!» диэн хоруйдуубун, астына кэпсиибин. Күннээҕи түбүккэ да сырыттарбын, быыс-арыт булан, дьоммун, атастарбын кытары куруук сибээскэ тахсабын. Уоппускабар Саха сиригэр куруук кэлэбин, айылҕаҕа тахсабын.

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ