Саха Сирин күрэсчиттэрэ 11 күрэс төрүт көрүҥэр күөн көрсүһэллэр. 196 кэмпилиэк наҕараада оонньонор. Мандаат хамыыһыйата иһитиннэрбитинэн, барыта 35 хамаанда, 1521 кыттааччы уонна 516 дэлэгээссийэ бэрэстэбиитэллэрэ суруттаран тураллар. 300 судьуйа уонна 200-тэн тахса үтүө көмөһүт кыттар. 173 иһитиннэрэр-биллэрэр эйгэ үлэһиттэрэ Оонньуулары сырдатан дьоҥҥо тиэрдэллэр. Маны таһынан, федеральнай «Матч», «Спорт-экспресс», итиэннэ өрөспүүбүлүкэтээҕи «Саха» НКИХ, «Мой спорт», «Мамонт» ханааллар, «Тэтим» араадьыйа сонуннары сойуппакка көрдөрөллөр, иһитиннэрэллэр.
Күрэс күүрэнэ улаатар
От ыйын 7 күнүттэн күрэхтэһиилэр саҕаламмыттара. Номнуо бастакы кыайыылаахтар быһаарылыннылар. Бастакы күн түмүгүнэн Уус Алдан, Чурапчы, Нерюнгри, Үөһээ Бүлүү, Нам улуустара иккилии кыһыл көмүс мэтээллээхтэр. Үөһээ Бүлүүлэр номнуо түөрт үрүҥ көмүс мэтээллэннилэр. Онтон хаҥаластар, мэҥэлэр, уус алданнар иккилии үрүҥ көмүстээхтэр. Мэҥэ Хаҥалас улууһа түөрт боруонса мэтээллээх. Чурапчылар үс уонна бүлүүлэр икки боруонсалаахтар. Оонньуулар иккис күнүн саҕаланыыта 10 км сүүрүүгэ Наталья Леонтьева биэтэккэ бастакынан кэллэ уонна Сунтаар улууһугар кыайыыны аҕалла.
Ол курдук, Таатталар бэйэлэрин кыыстара Сардаана Тарасова бастакы күн маҥнайгынан 58 киилэҕэ киирэ анньыытыгар, 24 киилэлээх киирэни 63-тэ анньан, кыһыл көмүс мэтээли ылан биир дойдулаахтарыгар өрөгөй үөрүүтүн бэлэхтээтэ. Кини кыайыытын туһунан маннык кэпсиир:
-- Федерация куубагын кэннэ хараҕым уоттанан, ааспыт сыл ахсынньытыттан күүстээхтик дьарыктанан саҕалаабытым. Бэйэм дойдубар күрэхтэспитим икки төгүллээх улахан эппиэтинэс. Бастаан наһаа ыарахан этэ, онтон билигин сыалбын-сорукпун ситиһэн, санаам чэпчээтэ, – диир чөмпүйүөн.
Сардаана күһүн Бурятияҕа Сергей Леонов аатынан Бүтүн Арассыыйатааҕы турнирга кыттар, ону тэҥэ успуорт маастарыгар хандьыдаат нуорматын толорор былааннаах.
Антонина Неустроева, Ытык -Күөл
-
3
-
0
-
0
-
0
-
0
-
0
