Пресс-релизкэ: “Оонньууларга кыттар Арассыыйа спортсменнара бары тэрилтэ аатын толору суруйбакка, “ROC” диэн аббревиатураны туһаналлара ирдэнэр. Экипировкаҕа Арассыыйа ханнык баҕарар символын, ол иһигэр былааҕын уруһуйа ROC эмблематыгар уларытыллыахтаах. Өскөтүн спортсмен таҥаһыгар Арассыыйа олимпийскай кэмитиэтин аата толору суруллубут буоллаҕына, сотуллуохтаах эбэтэр ROC аббревиатуранан солбуллуохтаах. Ити уһун тыллары сотор кыаллыбат түбэлтэтигэр эбэтэр “Арассыыйа”, “нуучча” диэн тыллар ойуччу суруллубут буоллахтарына, “нейтральнай спортсмен” диэн тыл ыраахтан көстөр гына улахан кээмэйинэн суруллуохтаах”, -- диэбиттэр.
Маннык быраабыла Арассыыйа спортсменнара туттар малларыгар эмиэ сыһыаннаах. RUS буолбакка, ROC аббревиатура туһаныллыахтаах. Ону тэҥэ Арассыыйа олимпийскай кэмитиэтэ Олимпиада бары өрөгөй түгэннэригэр Арассыыйа национальнай гимнин оннугар атын муусуканы талан туһанарыгар дьаһайдылар. Ону МОК ситэриилээх кэмитиэтэ талыахтаах.
Санатан эттэххэ, Спорт арбитражнай суута (CAS) 2020 сыл ахсынньы 17 күнүгэр Аан дойдутааҕы антидопинг агентствотын (WADA) уонна Арассыыйатааҕы антидопинг агентствотын (РУСАДА) икки ардыларынааҕы мөккүөргэ быһаарыы таһаарбыта. Дьиҥэр, суут WADA санкциятын сымнатан, накаастабыл болдьоҕун икки төгүл кылгаппыта. CAS уурааҕынан Арассыыйа спортсменнара норуоттар икки ардыларынааҕы улахан күрэхтэһиилэргэ – Олимпийскай уона Паралимпийскай оонньууларга, аан дойду чөмпүйэнээттэригэр Арассыыйа былааҕын аннынан 2022 сыл ахсынньы 16 күнүгэр диэри кыттар бырааптара быһыллан турар.
-
0
-
0
-
0
-
0
-
0
-
0
