Красноярскай куоракка Иван Ярыгин аатынан аан дойду таһымнаах көҥүл тустуу Гран-при турнира буолан ааста. Бу турнирга саха тустууктара үс мэтээли ыллылар: биир кыһыл көмүһү уонна икки үрүҥ көмүһү.
57 киилэҕэ диэри ыйааһыҥҥа Арыйаан Тютрин турнир муҥутуур кыайыылааҕынан буолла. Белоруссия аатыттан киирсэр саха бөҕөһө бүтэһик киирсиитигэр Дагестан кэскиллээх тустуугун Мусу Мехтихановы 9:5 ахсаанын хотто. Бу ыйааһыҥҥа боруонса мэтээли Тамир Гармаев (Бурятия) уонна Арассыыйа чөмпүйүөнэ Рамиз Гамзатов (Дагестан) үллэһиннилэр. Санаттахха, былырыын Арыйаан Тютрин бу турнирга боруонса хаһаайына буолбута.
Саха хамаандатыгар өссө биир кыһыл көмүһү Виктор Рассадин аҕалыан сөп этэ. Кини 70 киилэҕэ диэри тустубута. Он гынан баран, Дьобуруопа чөмпүйүөнүгэр Курбан Шираевка 1:8 ахсаанынан бэрт кыһыылаахтык сабырыйтаран, үрүҥ көмүскэ тигистэ. Даҕатан эттэххэ, дагестанец былырыыҥҥы чөмпүйүөннээбит аатын көмүскээтэ.
61 киилэҕэ диэри ыйааһыҥҥа Ньургун Александров эмиэ биир эмэ эбии мэтээли хаба тардан ылыан сөп этэ. Ол эрээри, боруонса иһин киирсиигэ Тыва бөҕөһүгэр Зир Тюлюшка 5:7 ахсаанынан кыайтарда.
Дьахталларга 55 киилэҕэ диэри ыйааһыҥҥа Севиль Назарова үрүҥ көмүһү ылла.
Красноярскайга турнир өссө да түмүктэнэ илик. Ыам ыйын 29 күнүгэр “Иван Ярыгин” көбүөрүгэр 74, 86, 92 уонна 97 киилэҕэ диэри ыйааһыннаах бөҕөстөр тахсыахтара. Киэһээҥҥи бырагыраамаҕа 65, 79 уонна 125 киилэҕэ диэри ыйааһыннаах тустууктар күөн көрсүөхтэрэ.
Sportyakutia.ru матырыйаалынан.
-
0
-
0
-
0
-
0
-
0
-
0
