Бу түмүктэнэн эрэр нэдиэлэ эмиэ кыайыы-хотуу бөҕөтүн аҕалла. Ол курдук, атырдьах ыйын 11-17 күннэригэр Каппадокияҕа дьахталларга 64 харахтаах дуобакка Европа чемпионата буолан ааста. Онно Сандаара Апросимова чөмпүйүөннээтэ. Бу -- Саха сирин дуобатын историятыгар аан бастакы маннык улахан ситиһии!
Аартыка норуоттар икки ардыларынааҕы оскуолатын (МАШ) IХ кылааһын үөрэнээччитэ Сандаара Апросимова полуфиналга гроссмейстер, аан дойду икки төгүллээх чөмпүйүөнэ Бупеева Жаннаны (Арассыыйа), финалга Украинаттан сылдьар гроссмейстер, аан дойду чөмпүйүөнэ Короткая Еленаны кыайан, Европа чөмпүйүөнэ буолар үрдүк аата сүктэ.
Сандаара Ф.И.Авдеева аатынан Оҕо дыбарыаһыгар дуобакка дьарыктанар. Тренерэ — Павлов Иван Олегович.
Сахалин уобалаһын Поронайскай куоратыгар мас-тардыһыытыгар Арассыыйа чемпионата буолан ааста. Онно Тампо улууһун Саһыл дэриэбинэтиттэн төрүттээх Сергей Фролкин абсолютнай чөмпүйүөн буолла. Кини финалга аан дойду биллэр мас-рестлерэ Виктор Колибабчуктуун күөн көрүстэ уонна тыҥааһыннаах киирсиигэ биһиги бухатыырбыт кыайыыны ситистэ. Саха сирин бэрэстэбиитэлэ Артем Ветров абсолютнайга үһүстээн үөртэ.
Бу чемпионакка Амматтан төрүттээх эдэр мадьыны Татьяна Баишева 85 киилэттэн үөһэ ыйааһыннаах дьахталларга күрэстэһээччилэрин барыларын хотон, муҥутуур кыайыылаах буолары ситистэ. Кини тренерэ – аҕата, бары билэр киһибит, улахан спортсмен, бастыҥ мадьыны Анатолий Баишев.
Татьяна быйыл Амма 2-с нүөмэрдээх орто оскуолатын бүтэрэн, Дьокуускайдааҕы юридическай-полицейскай колледжка үөрэххэ киирбит. “Салгыы дьарыктанан, кэлэр сылга ыытыллыахтаах Аан дойду Кубогын ылар баҕалаахпын», -- диэн санаатын үллэстэр.
- 0
- 0
- 0
- 0
- 0
- 0