Бэҕэһээ балаҕан ыйын 6 күнүгэр Москва Кыһыл болуоссатыгар Паралимпийскай оонньууларга ситиһиилээхтик кыттыбыт Арассыыйа хамаандатын чиэстээһин буолла. Спортсменнарбыт дойдуларыгар 118 мэтээли аҕаллылар. "Оонньуулар устуоруйаларыгар бу бастыҥ көрдөрүү буолар" диэн РФ Бэрэсидьиэнин иһининэн үлэлиир СӨ Бастайааннай бэрэстэбиитэлистибэтигэр иһитиннэрбиттэр.
Арассыыйа Паралимпийскай кэмитиэтин сүүмэрдэммит хамаандатыгар Саха сирин спортсменнара киирбиттэрэ. Харбааһыҥҥа Анастасия Диодорова, оҕунан ытыыга Степанида Артахинова, олорон эрэ волейболга Алена Дмитриева күрэхтэстилэр. Степанида Артахинова оҕунан ытыыга (микст) боруонса мэтээли ылла. Анастасия Диодорова 100 миэтэрэ дистанцияҕа харбааһыҥҥа бэһис буолбута. Алена Дмитриева эмиэ үчүгэйдик кыттыбыта.
Степанида Артахинова Кыһыл болуоссакка буолбут чиэстээһиҥҥэ кытынна. Призердар чиэстэригэр, судаарыстыба өрөгөй ырыатыгар доҕуһуоллатан, Арассыыйа былааҕын көтөхпүттэрэ. Саха сириттэн спорт салалтатын бэрэстэбиитэллэрэ уонна Москваҕа олохтоох сахалар Степанида Артахинованы көрсөн эҕэрдэлээтилэр.
-
0
-
0
-
0
-
0
-
0
-
0
