Ити кыа хааннаах түбэлтэ 1943 с. олунньу 22 күнүгэр буолбута. Онон Аҕа дойдуну көмүскээччи күнүгэр Ил Түмэн Бэрэссэдээтэлэ Алексей Еремеев, дьокутааттар Виктор Губарев, Антонина Григорьева, Владимир Чичигинаров, Валерий Лютай, итиэннэ Ил Дархан уонна Бырабыыталыстыба дьаһалтатын салайааччы Георгий Михайлов, куорат Дууматын бэрэссэдээтэлэ Альберт Семенов, СӨ байыаннай комиссарын солбуйааччы Степан Спиридонов, Дьокуускай бэтэрээннэрин Сэбиэтин бэрэссэдээтэлэ Николай Тряпша уо.д.а. “Ильмень үрдүнэн туруйалар” мемориал-сквергэ кэриэстэбил миитинин оҥордулар.
Парламент спикерэ Алексей Еремеев тыл этэригэр, бу өйдөбүнньүк бэлиэ оҥоһуллубут устуоруйатын сырдатта. Кини ыччат миниистиринэн үлэлии олордоҕуна, ити 2005 сыллаахха, энтузиастар Николай Атласов уонна Анатолий Кириллин кэлэннэр, Улуу Кыайыы 60 сылынан Ильмень күөлгэ сэриилэспит 597 буойун сырдык аатыгар сквер оҥоруохтарын баҕаралларын туһунан эппиттэр. Министиэристибэ өйөөн, толорор былаас уорганнарыгар тахсан, элбэх тэрилтэттэн спонсор көрдөөн, бу мемориал баар буолбут. “Маннык пааматынньыктар ааспыт чахчыны кэрэһилииллэр, аҕа көлүөнэ дьон төһөлөөх сиэртибэнэн дьоллоох олох уйгутун уһансыбыттарын кэнчээри ыччакка кэпсииллэр, -- диэн Алексей Ильич бэлиэтээн эттэ. – Билигин дойдубутугар тыҥааһыннаах күннэр үүннүлэр, арҕааттан суоһарҕаныы тыына биллэр. Урут да Ийэ дойдубутун туруулаһан көмүскээбиппит, билигин да кыраныыссабытыгар сэбилэниилээх күүстэри чугаһатыахпыт суоҕа. Олохтоохтор бэйэбит национальнай, судаарыстыбаннай интэриэстэрбитин көмүскүөхпүт”.
Түмүгэр Алексей Ильич билигин аармыйаҕа сулууспалыы сылдьар эр бэртэрэ Аҕа дойду Улуу сэриитигэр кыргыспыт эһэлэрин, хос эһэлэрин курдук дьоһун, хорсун-хоодуот, төрөөбүт дойдуларыгар бэриниилээх буойун буолалларыгар баҕарда.
-
0
-
0
-
0
-
0
-
0
-
0
