Бу буола турар балаһыанньаҕа санаатын үллэстэригэр көрдөспүппүтүгэр Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин маннык эттэ:
-- Аан дойдуга буола урар быһыы-майгы бэҕэһээ дуу, бүгүн дуу саҕаламматаҕын бары билэбит. АХШ, НАТО Украинаҕа "майдааны" тэрийэн, кинилэр ыытар бэлиитикэлэрин өйүүр, Арассыыйаны утарар салалтаны туруоран, күөнтэһиини ыытарын билбэт киһи суоҕа буолуо. Ол түмүгэр нууччалыы тыллаах олохтоохтору утары геноциды, национализмы күөртээһин, дьону-сэргэни маассабайдык өлөрүү, неонацизм идеологиятын өрө тутуу бу уонча сыл устата Украина иһигэр хаатыйаланна. Ол "кутургуйаны" кэмигэр суох гымматахха, омсолоох көстүү тарҕанан барыах курдук чинчилэннэ.
Арассыыйа Бэрэсидьиэнэ Владимир Путин, байыаннай операцияны саҕалыырга тоҕо бирикээс биэрбитин, Аан дойдуга бүтүннүүтүгэр сиһилии быһааран биэрдэ. Сэрии диэн ыарахан, ону бары өйдүүбүт. Ол эрээри, аҕыс сыл устата дипломатия тылын өйдөөбөт буоллахтарына, НАТО Украинаны кигэн, сэриитин -сэбиргэлин биһиги кыраныыссабытыгар чугаһатар буоллаҕына, күүһү эрэ көрдөрөр суол хаалла, биһиэхэ.
Сэрии ыарахан кэмигэр биһиги түмсэн, өйбүтүн-санаабытын түмэн, тылбытын-өспүтүн тардынан, биир сомоҕо буолабыт. Урут уруккаттан Арассыыйа устуоруйата ону кэрэһэлиир. Сэриигэ биһигини кыайбыт омук суох. Бу буола турар балаһыанньанан, элбэх бобуу-хаайыы, санкция киирбитинэн, бэйэбит дойдубут иһигэр эмиэ сааһыланыы барыан наада дии саныыбын! Арҕаа дойдулары үтүктэр, ыччат өйүн-санаатын буккуйар араас саарбах бырайыактары, тэлэбиидэнньэҕэ, интернеккэ баар биэриилэри, "мультик геройдарын", муоданы хааччахтыахха! Биһиги бэйэбит ураты култууралаахпыт, тыллаахпыт, эһэлэрбит-эбэлэрбит ситиспит ситиһиилэрин, дьиэ кэргэн педагогикатын сөргүтэн, олохтоох аспытын аһаан, оҥорон таһаарыыны салгыы сайыннаран, бэйэ күүһүгэр эрэли үөскэтэн олорорбут наада.
-
0
-
0
-
0
-
0
-
0
-
0
