Издательский дом Редакция Подписка
Погода в Якутске: . -12 oC

СӨ Ил Дарханын сорудаҕынан Ил Түмэн Бэрэссэдээтэлин бастакы солбуйааччы Александр Жирков кулун тутар 23-25 күннэригэр Кыргыстаан Өрөспүүбүлүкэтигэр тиийэн, Саха АССР төрүттэммитэ 100, саха норуотун уонна Кыргыстаан судаарыстыбаннаһын төрүттээччилэриттэн биирдэстэрэ Максим Кирович Аммосов төрөөбүтэ 125 сылыгар аналлаах үбүлүөйдээх тэрээһиннэр тустарынан официальнай кэпсэтиилэри ыытан кэллэ.

СӨ Ил Дарханын сорудаҕынан Ил Түмэн Бэрэссэдээтэлин бастакы солбуйааччы Александр Жирков кулун тутар 23-25 күннэригэр Кыргыстаан Өрөспүүбүлүкэтигэр тиийэн, Саха АССР төрүттэммитэ 100, саха норуотун уонна Кыргыстаан судаарыстыбаннаһын төрүттээччилэриттэн биирдэстэрэ Максим Кирович Аммосов төрөөбүтэ 125 сылыгар аналлаах үбүлүөйдээх тэрээһиннэр тустарынан официальнай кэпсэтиилэри ыытан кэллэ.

 Александр Жирков Кыргыстаан Судаарыстыбаннай Сэкирэтээрэ (вице-бэрэсидьиэн) Суйунбек Касмамбетовы, кыргыз парламенын Бэрэссэдээтэлэ Талант Мамытовы, КӨ Култуураҕа, информацияҕа, спорка уонна ыччат бэлиитикэтигэр миниистирэ Азамат Жуманкуловы уо.д.а. официальнай дьону, ону сэргэ кыргыз култууратын уонна искусствотын биллиилээх дьонун кытта көрүстэ. Александр Николаевич быйылгы үбүлүөйдээх сылга ыытыллар тэрээһиннэр тустарынан иһитиннэрдэ, өрөспүүбүлүкэ салалтатын аатыттан кыргызтар кытталларыгар этии киллэрдэ.

Жирков

Суйунбек Касмамбетов Кыргыстаан уонна Саха Сирин икки ардыгар култуурунай-гуманитарнай, о.д.а. сибээстэри салгыы сайыннарыыга интэриэстээхтэрин биллэрдэ. Кыргыстаан дэлэгээссийэтэ биһиэхэ бэс ыйыгар, оттон СӨ дэлэгээссийэтэ Кыргыстааҥҥа алтынньы-сэтинньи ыйдарга сылдьыахтара диэн барыллаан сөбүлэһии оҥоһулунна.

Александр Жирков Кыргыстаан айар интэлигиэнсийэтин улахан бөлөҕүн кытта көрүстэ. КӨ парламенын дьиэтигэр буолбут көрсүһүүгэ КӨ норуодунай суруйааччылара Кенеш Жусупов, Анатай Омурканов, Бейшебай Усубалиев, Акбар Рыскулов, Жедигер Саалаев, Бактыгул Чотурова, Кыялбек Урманбетов, Нуржан Тентимишова уо.д.а. кытыннылар.

"Кыргыз литературатын аксакаллара Александр Жирковка бырааттыы норуоттар бигэ ситимнэһиилэригэр, 2017 с. Дьокуускайга Кыргыз литературатын уонна искусствотын күннэрин тэрийэн ыытыыга, эпостан саҕалаан литературалар айымньыларын хардарыта тылбаастаныыларыгар уһун кэмнээх сыралаах үлэтин билинэн махтаннылар. “Саха Сиригэр аан бастаан Кыргыз литературатын күннэрэ 1967 сыллаахха ыытыллыбыттара, – диэн эттэ көрсүһүүгэ Александр Николаевич. – Ол култуурунай событие буолбута лоп курдук үйэ аҥаара, 50 сыл ааспытын кэннэ, 2017 с. Саха Сиригэр кыргыз суруйааччыларын кытта көрсүһүү тэриллибитэ. Биһиги утумнааччыларбыт бу үтүө үгэһи салгыахтара уонна төрөөбүт тылларынан национальнай литература уонна искусство кыһалҕаларын ырытыахтара диэн эрэнэбин”.

Александр Николаевич Чингиз Айтматов бииргэ төрөөбүт балтын, биллиилээх учуонай, суруйааччы уонна уопсастыбаннай диэйэтэл Роза Торекуловна Айтматованы, Чингиз Айтматов төрөппүт уолун, дипломат, уопсастыбаннай диэйэтэл Асхар Айтматовы, КӨ Национальнай академиятын Чингиз Айтматов аатынан тыл уонна литература институтун дириэктэрин, академик Абдылдажан Акматалиевы, кыргыз норуодунай суруйааччыта Акбар Рыскуловы уо.д.а. кытта биирдиилээн туспа көрүстэ. Кини Ил Түмэн аатыттан Розетта Айтматованы 85 сааһынан эҕэрдэлээтэ, Ил Дархан аатыттан эҕэрдэ тылларын тириэртэ.

сайт1 2

Розетта Торекуловна СӨ Ил Дарханыгар иһирэх эҕэрдэтин иһин махталын тиэрдэргэ көрдөстө уонна парламент Судаарыстыбаннаһын мусуойугар, СӨ Национальнай бибилэтиэкэтигэр кэлиҥҥи сылларга нуучча уонна кыргыз тылларынан тахсыбыт кинигэлэрин бэлэхтээтэ.

Иссык-Куллааҕы форум салайааччыта Асхар Айтматовы кытта норуоттар икки ардыларынааҕы тэрилтэ инники үлэтин туһунан кэпсэтии буолла. “Чингиз Айтматов төрөөбүтэ 95 сылыгар Иссык-Куллааҕы форум Азербайджаҥҥа ыытыллара ордук” диэн сүбэлэһии буолла.

d614aff6 07be 4da0 bcc9 c3fdbe842a34

Александр Жирков Алыкул Осмонов аатынан Национальнай бибилэтиэкэҕэ сырытта. Манна 2012 сыллаахха, Максим Аммосов төрөөбүтэ 115 сылыгар, Александр Жирков көҕүлээһининэн М.К. Аммосов пуондата тэриллибитэ. Бу сырыытыгар Александр Жирков Кыргыстаан киин бибилэтиэкэтигэр Саха Сиригэр кэлиҥҥи сылларга тахсыбыт кинигэлэри  бэлэхтээтэ. Бибилэтиэкэ дириэктэрэ Нуржан Имакулованы кытта көрсүһүүгэ Александр Жирков саха кинигэлэрин анал пуондатын тэрийэргэ уонна СӨ Национальнай бибилэтиэкэтин кытта бигэ сибээһи олохтуурга  этии киллэрдэ. Үлэ маннык киэбин бастакы вице-спикер КӨ Национальнай мусуойга эмиэ эттэ. «Эһиги мусуойгут пуондатын, чуолаан М.К. Аммосов Кыргыстааҥҥа үлэлээбит кэрдииһин сырдатар эбии матырыйаалларынан толорууга Саха Өрөспүүбүлүкэтэ кыттыах этэ,” – диэтэ кини.

“Аан дойду норуоттарын эпостара” норуоттар икки ардыларынааҕы Ассоциация вице-бэрэсидьиэнин быһыытынан Александр Жирков араас тэрээһиннэргэ сылдьан билсибит ытыктыыр дьоно Жакиевтар кыыстара Гульмираҕа төрөппүттэрэ – Кыргыстаан Өрөспүүбүлүкэтин Дьоруойа, КӨ норуодунай суруйааччыта, “Аан дойду норуоттарын эпостара” норуоттар икки ардыларынааҕы Ассоциация Бэрэсидьиэнэ Бексултан Жакиевич Жакиев уонна кэргэнэ Сабирабига Жакиева -- олохтон барыыларынан дириҥ кутурҕанын тиэртэ, кинилэр уҥуохтарыгар сибэкки уурда.

КӨ Судаарыстыбаннай Сэкирэтээрэ Суйунбек Касмамбетовы, КӨ Парламенын Бэрэссэдээтэлэ Талант Мамытовы кытта көрсүһүүгэ Александр Жирков: “КӨ Бырабыыталыстыбата уонна Ил Түмэнэ норуоттар икки ардыларынааҕы Ассоциация үлэтин өйүөхтэрэ”, -- диэн эрэнэрин эттэ. “Аан дойду 16 судаарыстыбатын бэрэстэбиитэллэрэ тэрийбит уонна аан дойду эпическэй эйгэтигэр үйэ чиэппэрэ кэриҥэ үлэлээн кэлбит тэрилтэ салгыы үлэлиэхтээх уонна бу тэрилтэ киинэ Кыргыстааҥҥа хаалыахтаах”,  -- диэтэ Александр Николаевич. КӨ Судаарыстыбаннай Сэкирэтээрэ Суйунбек Касмамбетов Александр Жирков этиитин өйөөтө уонна: “Ассоциация үлэтэ, аан дойду норуоттарын эпическэй нэһилиэстибэлэрин харыстааһыҥҥа, үөрэтиигэ уонна тарҕатыыга аналлаах бырайыактар Кыргыстааҥҥа салгыы өйөнүөхтэрэ”, -- диэн бэлиэтээтэ.

Кыргыстааҥҥа соторутааҕыта аһыллыбыт “Манас” тыйаатырыгар истиҥ көрсүһүү буолан ааста. «Аан  дойду норуоттарын эпостара” тэрилтэ вице-бэрэсидьиэнэ Александр Жиркову кытта көрсүһүүгэ Кыргыстаан биллиилээх манасчылара, аччыгый эпоһы толорооччулар – дастанчылар уонна норуот ырыаһыттара – акыннар муһуннулар. Александр Жирков мустубут дьоҥҥо өрөспүүбүлүкэбитигэр эпическэй нэһилиэстибэни харыстааһыҥҥа, үөрэтиигэ уонна тарҕатыыга үлэ туһунан кэпсээтэ. “Манас” киинэ биһиги Олоҥхобут тыйаатырын уонна Олоҥхо дьиэлэрин кытта билсиһэн, икки омук эпическэй нэһилиэстибэтин харыстааһыҥҥа уонна тарҕатыыга үлэлэһэллэригэр сүбэлээтэ.

Александр Жирков үс сыл сабыллан турбут Кыргыстаан Национальнай тыйаатыра аһыллыытыгар кытынна. Үбүлүөйдээх тэрээһиннэр былааннарын быһыытынан, бу күһүн ити тыйаатыр сыанатыгар Саха Сирин  артыыстара кэнсиэрдиэхтэрэ.

Бишкек куоракка олорор саха дьонун кытта истиҥ көрсүһүү буолла.  Александр Николаевич көҕүлээһининэн, өссө 2012 сыллаахха Кыргыстааҥҥа олорор сахалар “Олоҥхо” түмсүүлэрэ тэриллибитэ. Онуоха Кыргызтаан Норуоттарын Ассамблеята туспа кэбиниэт биэрбитэ. Онон саха диаспората, Киргизскэй ССР хомуньуус баартыйатын Киин Кэмитиэтин Бастакы сэкирэтээрэ М.К. Аммосов 1937 сыллаахха үлэлээбит дьиэтигэр анал хос бэриллэн, онно түмсэллэр.

f286c913 8be6 49d2 9c4b 2f0bc89354d4

Александр Жирков биир дойдулаахтарыгар Саха АССР 100 уонна М.К. Аммосов төрөөбүтэ 125 сылларыгар аналлаах былааны кэпсээтэ, ыытыллар тэрээһиннэргэ көхтөөхтүк кытталларыгар ыҥырда. Саха диаспоратын  бэрэстэбиитэллэрэ Александр Николаевичка куруук болҕомтотун, өйөбүлүн иһин махтаннылар, былааннарын, кыһалҕаларын кэпсээтилэр. “Кыргыстааҥҥа буолар официальнай, онтон да атын тэрээһиннэргэ анаан   кыттаргытыгар эһиги туох-ханнык иннинэ Сахаҕыт Сирин, төрөөбүт норуоккутун көрдөрөҕүт . Онон эһиэхэ ити өттүгэр өйөбүл, көмө баар буола туруоҕа», -- диэтэ Александр Николаевич.

Көрсүһүү кэнниттэн саха диаспоратын кыттыылаахтара А.Н. Жирков көҕүлээһининэн 2012 с. Бишкек куорат киинигэр Саха Өрөспүүбүлүкэтин уонна Кыргыстаан Өрөспүүбүлүкэтин уопсастыбыннаһын күүһүнэн туруоруллубут М.К. Аммосов мэҥэ өйдөбүнньүгэр сибэкки уурдулар.

Саха Сиригэр төннөн иһэн, Москубаҕа Александр Жирков Арассыыйа Федерациятыгар Кыргыстаан посола Гульнара-Клара Саматы кытта көрүстэ.

Сергей Васильев.

 

 

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением