Тэрээһиҥҥэ СӨ Бырабыыталыстыбатын бэрэссэдээтэлин солбуйааччы Сергей Местников, Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Сахамин Афанасьев кытыннылар.
Өймөкөөн улууһун баһылыга Иннокентий Сивцев «Өбүгэ ыллыгынан айан эспэдииссийэ» дириҥ суолталааҕын бэлиэтээн туран, Дугуйдааҥҥа ситиһиилээх айаҥҥа алгыс тылларын эттэ.
Ил Түмэн аатыттан Сахамин Афанасьев тыл этиитигэр Дугуйдаан бу айана, туруоруммут сыалын ситиһиитэ элбэх саха ыччатыгар үтүө холобур буоларын тоһоҕолоон бэлиэтээтэ. Удьуор сылгыһыт Винокуровтар дьиэ кэргэн саха дьонун аар-саарга аатыртылар, олох атын өйдөбүлү биэрдилэр диэн эттэ. Дугуйдааҥҥа тостубат тулууру, булгуруйбат быһаарыныыны, самныбат санааны, ис кыахха эрэнэр сүдү күүһү баҕарда.
СӨ Бырабыыталыстыбатын бэрэссэдээтэлин солбуйааччы Сергей Местников бу айан төрөөбүт дойдуга таптал, өбүгэ үгэстэрин тутуһуу, саха ытык дьонун кэриэстээһин буоларын бэлиэтээтэ.
«Өбүгэ ыллыгынан айан» бырайыагын Дугуйдан Винокуров быйыл Өймөкөөн улууһугар ыытыллар Олоҥхо ыһыаҕар аныыр. Кини саха норуотун икки сүгүрүйэр улуу дьоно — Өймөкөөн улууһун 1-кы гильдиялаах меценат- атыыһыта Николай Кривошапкин уонна саха бөлүһүөгэ Алексей Кулаковскай Магадаан Сэйимчээнигэр айаннаабыт суолларынан аһаҕас халлаан анныгар хаарга хонон айанныаҕа.
Бу олус улахан суолталаах айаҥҥа атаарыы сиэригэр-туомугар улуус нэһилиэктэрин дэлэгэссийэлэрэ, Томтор олохтоохторо, Сочи куораттан кэлэ сылдьар ыраах айан туристара кыттыыны ыллылар.
Елена Потоцкая матырыйаалынан Ил Түмэн пресс-сулууспата
-
0
-
0
-
0
-
0
-
0
-
0
