Сэбиэскэй сойуус сорҕото буолан өр кэмҥэ ыаллаһа олорбут Грузия Арассыыйа утары сааҥсыйа киллэрэртэн аккаастаммыта. Аҕыйах хонугунан дойду авиахампаанньалара Москваттан Тбилисига тиһигин быспакка көтүөхтэрэ.
Онон аатырбыт «Боржоми» минеральнай ууну амсайа, Кавказ хайаларыгар сынньана, Батуми Хара муоратыгар сөтүөлүү кэлээччи ахсаана элбиир чинчилээх.
Арассыыйа туроператордарын түмсүүтэ иһитиннэрэринэн, туристары Грузияҕа сынньата илдьии ыам ыйын бүтэһигэр саҕаланыан сөп. Аан дойдуга кавказскай ыалдьытымсаҕынан аатырбыт Грузия амтаннаах аһын: шашлык, хинкали, долма, хачапури амсайа, Аджария пальманан хаймыыламмыт набережнайыгар күүлэйдии барыан баҕалаах хаһан баҕарар элбэх.
Өссө Сэбиэскэй кэмтэн үгүс дьон күннээх Грузияҕа сөбүлээн сынньаналлар, Кавказ үтүө үгэһинэн, ыалдьыт кэллэҕинэ олохтоохтор наһаа үөрэллэрин, остуолга баардарын-суохтарын барытын ууран биэрэллэрин туһунан кэпсииллэр.
Грузия Турцияны кытта кэккэлэһэ сытар, онон загранпааспардаах дьон оптуобуһунан Кемальпаша куоракка тахсан, Стамбултан аҕалбыт таҥастарын чэпчэки сыанаҕа атыылаһыахтарын сөп.
Оптуобустар Батумиттан Трабзон, Анкара, Стамбул куораттарга тиийэллэр эрээри, саамай түргэн тырааныспар — сөмөлүөт.
Хаартыска: ht.kz.tours/georgia//ru, турывгрузию.ру
-
0
-
0
-
0
-
0
-
0
-
0
