Куорат килбэйэр киинигэр баар «Проспект», «ЦУМ», «Московскай» атыы-эргиэн кииннэригэр сырыттым. Манна сибэкки курдук араас чаҕылхай өҥнөөх көстүүм, бүрүүкэ, жакет арааһа баар, хаачыстыбата даҕаны тупсаҕай.
Биир пиджак сыаната 9 500 – 12 500 солк., көстүүм 20 000 – 25 000 солк., түүппүлэ 8500 -10 500 солк., тирии суумка 7500 солк. Атаххыттан төбөҕөр диэри дьыалабыай истиилгэ таҥнарга бүтүн хамнаскын 40 000 солк. ууран биэриэххин наада эбит.
Өҥүн дьүөрэлээн, дьууппа/бүрүүкэ, топик, пиджак, суумка атыылаһарга 30 000 солк. элбэҕи барыыгын. Сайыҥҥы былааччыйа 8500 – 11500 солк, ол өҥүгэр барсар чараас жакет 8500 солк.-13000 солк. Онон үгүс дьахтар ымсыырбыттыы көрөр эрээри, атыылаһааччы аҕыйах.
Оттон «Gloria Jeans», «Тerranova» маҕаһыыннарга 1500 солк. былааччыйалар, 1200 солк. бүрүүкэлэр, 1100 солк. дьууппалар бааллар эрээри, матырыйаалын хаачыстыбата сыанатыгар сөп түбэһэр. Ол иһин үксэ устудьуоннар, эдэр ыччат сылдьар.
«Апельсин» маҕаһыыҥҥа сыана быдан демократичнай, манна булууһа 5500 солк., дьууппа 6500 -7500 солк. «Айсберг» атыы-эргиэн киинигэр сыана саамай ыарахан, биир пиджак 15 750 солк. саҕаланар, бүрүүкэ 8500-9500 солк.
Маҕаһыыннары кэрийэн көрдөххө, билигин араас өҥнөөх бүрүүкэлээх көстүүм муода буолбут. Нарын сирень, от күөҕэ, оранжевай саҥа тыллыбыт сир симэҕин курдук киһи эрэ сүргэтин көтөҕөр.
Дьыалабыай таҥас дьыл кэмиттэн көрөн уратылаһар, кыһыҥҥы-сайыҥҥы көстүүм, онно барсар булууһа, былааччыйа, атах таҥаһа, суумка атыылаһаргар сүүһүнэн тыһыынча ирдэнэр. Билигин судаарыстыбаннай тэрилтэҕэ 40 000 – 50 000 солк. хамнастаах киһи үгүс, кинилэр хамнастарын үрдэттэххэ биирдэ үлэлэригэр дьыалабыайдык, дьоһуннук таҥныахтарын сөп.
-
0
-
0
-
0
-
0
-
0
-
0
