Анна Васильевна, Кардиологическай киин үлэһитэ:
— Үлэбитигэр биһиги үрүҥ халааттаах сылдьабыт, онон сарсын тугу кэтэбин диэн ыйытык турбат. Күннээҕи олоххо «casual» судургу истиили сөбүлүүбүн, бу спортивнай көстүүм көрдүү сылдьабын, сыаната 5000 солк. саҕаланар.
Ыйга иккитэ сөбүлүү көрбүт таҥаспын атыылаһар үгэстээхпин, саҥа таҥас ыллахпына сэргэхсийэбин, санаам көтөҕүллэр. Бэйэтин таптыыр киһи үчүгэйдик таҥныахтаах диэн өйдөбүллээхпин. Биллэн турар, сыанатын көрбөккө эрэ атыылаһарга хамнас өссө эппиэттэһэ илик. Биэнсийэлээх, кыра хамнастаах дьон маҕаһыыҥҥа сылдьыбаттар даҕаны. Байыаннай дьайыы буолуоҕуттан ас-таҥас сыаната наһаа ыараата, оттон хамнас ону кыайан сиппэт.
Хаачыстыбалаах таҥас чэпчэки буолбат
Надежда Петровна, судаарыстыбаннай тэрилтэ үлэһитэ:
— Биһиэхэ үлэбитигэр кытаанах дресс-код тутуспаттар эрээри, үлэҕэ дьыалабыай таҥас биһирэнэр. Биллэн турар, хаачыстыбалаах таҥас хайдах даҕаны чэпчэки сыаналаах буолбат. Боростуой исписэлиис хамнаһа 50 000 солк., оттон үчүгэй көстүүм атыылаһарга хамнас аҥаарын ууран биэрэн баран хайдах хомунаалынай төлөбүргүн, ипотекаҕын төлөөн олоруоххунуй?
Саха Сирин олохтоохторо дьыл кэмэ уларыйарын аайы таҥаска бэрт халыҥ харчыны барыыбыт. Соҕуруу эрэгийиэннэр чараас куурканан, баайыы бэргэһэнэн кыстыыллар, оттон биһиги – 55-59 С тоһуттар тымныыны туоруурбутугар сүүһүнэн тыһыынча ирдэнэр. Аны сааскы сону, куурканы, кыһыҥҥы-сайыҥҥы атах таҥаһын атыылаһарга эмиэ үтүмэн үбү барыыгын.
Таҥаскыттан көрөн сыаналыыллар
Наталья Иннокентьевна, учуутал:
- Оҕолор куруук биир таҥастаах сырыттаххына, салҕан хаалаллар, онон төһө кыалларынан таҥаспын саҥарда сатыыбын. Үөрэх дьыла саҕаланыан иннинэ, бүтэһик чуорааҥҥа икки-үс көстүүм ылабын.
Оскуолаҕа, биллэн турар, учуутал дьаллайбыт сибиитэрэнэн, халҕайбыт ыстаанынан сылдьыбат. Дьыалабыай истииллээх, үрдүк хаачыстыбалаах, сыаналаах таҥаһы атыылаһабын. Үөрэнээччилэр, төрөппүттэр аан бастаан таҥаскыттан көрөн сыаналыыллар.
Мин хамнас, биэнсийэ ылабын, үлэм таһынан репетитордыыбын, оҕолору БКЭ-ҕэ бэлэмниибин, онон эбии харчы киирэ турар. Арай үлэбиттэн тохтоотохпуна, аҥаардас биэнсийэҕэ маҕаһыынтан таҥнар күчүмэҕэй буолуо.
Таҥаһынан үлүһүйбэппин
Айталина Андреевна, баан үлэһитэ:
- Биһиги килийиэннэри кытта үлэлиир буоламмыт, офиснай дресс-код тутуһабыт. Тус бэйэм саҥаттан саҥа таҥаһынан үлүһүйбэппин, бу кыра уолбар төрөөбүт күнүгэр бэлэх ыла кэллим. Харчыны үксүн дьиэ-уот, даача оҥостуутугар, сайыҥҥы сынньалаҥҥа уурунабыт.
Саҥа таҥас кэтэн баран умнан кэбиһиэҥ, оттон дьиэ кэргэнинэн омук дойдуларыгар сынньалаҥ оҕолор өйдөрүгэр-санааларыгар хаалан хаалар. Улаатан баран слоҥҥа хатааһылаабыттарын, муораҕа снорклинг кэмигэр араас балыктары, сулустары көрбүттэрин саныыллар. Ол иһин оҕолорбутун аралдьытарга, дьиэ кэргэни түмэргэ, сэргэхтик сынньанарга, сонун аһы амсайарга, экскурсияҕа сылдьарга харчыбытын харыһыйбаппыт.
Таҥас эргэрэр, умнуллар, быраҕыллар, оттон саҥаттан саҥа дойдуга сынньалаҥ олоҕуҥ тухары умнуллубат кэрэ өйдөбүл буолан сүрэххэр сөҥөн хаалар.
-
0
-
0
-
0
-
0
-
0
-
0
