Уопсастыба

Паарка Алдан өрүс хаҥас кытылыгар турар, олохтоохтор кэпсииллэринэн, манна хаһан эрэ сэбиэскэй кэм саҕана дьон-сэргэ сөбүлээн тоҕуоруйар, сынньанар сирэ этэ. Сарсыарда эрдэ туран сэрээккэ оҥороллоро, сүүрэллэрэ, эдэр ийэлэр кэлээскэлээх оҕолорун сибиэһэй салгыҥҥа сырытыннараллара. Оттон киэһэ өттүгэр кырдьаҕастар халыҥ лабаалаах мас анныгар олорон саахымат оонньууллара, аллея устун оҕолор сүүрэкэлииллэрэ, минньигэс баата уонна мороженай атыылаһаары уочараттыыллара.

Паарканы оҕотуттан кырдьаҕаһыгар тиийэ сөбүлүүллэрэ, айылҕа кэрэ туонатыгар үлэттэн, үөрэхтэн аралдьыйаллара. Сыл-хонук ааһан истэҕин аайы паарка тутуулара быраҕыллан, эргэрэн-эмэҕирэн барбыттара, дьон сылдьара аҕыйаабыта. Кураанахсыйа, өтөхсүйэ быһыытыйбыт пааркаҕа иккис тыын киллэрэн, саҥа тутуу ыытыллан, сэргэхсийэн, олох уруккутун курдук күөстүү оргуйда, кэлии-барыы сыыдамсыйда. 

Манна оҕолорго анаан спортивнай былаһаакка, волейбол, баскетбол, футбол оонньуурга киэҥ-куоҥ үс хонуу оҥоһулунна. Ойуур быыһыгар ырааһыйаҕа кэнсиэр көрдөрөргө сыана тутан биэрдилэр, эбэҥки норуотун төрүт дьиэтигэр чуумҥа атыы-эргиэн ыытыллар.

Спортивнай маршрут тыргыйан, кыһын-саас хайыһардыыллар, сайын бэлэсипиэт тэбэллэр.  Хас биирдии суол-иис, ыллык ыйынньык бэлиэлэрдээх,  хараҥаны сырдатар банаардардаах. Алдан өрүс долгуннурар сүүрүгүн олохтоохтор бэс уонна тиит мас быыһыгар ыскамыайкаҕа олорон эрэ көрөллөр. Тутууну ыытарга аарыма мастары тыыппакка, күөх дуолу хайдах баарынан хааллардылар.

Паарка — сиэркилэ көстүүтэ диэн туспа кэнсиэпсийэлээх. Өрүс икки кытылыгар турар Томмот аатын хаҥастан уҥа, уҥаттан хаҥас ааҕыахха сөп. Бу ураты көстүүнү туһанан, архитектор Анку Гасич уонна Александр Игнатьев сиэркилэ бүрүөһүннээх, сырдатыылаах «ТОММОТ» диэн инсталляцияны оҥорон таһаардылар. Пааркаҕа киирбит киһиэхэ бу сурук ыраахтан сандааран көстөр. 

Суол тоҕойугар баар маһынан оҥоһуллубут ыйынньыктар эмиэ сиэркилэ бүрүөһүннээхтэр, онно аттынааҕы мас чэлгийэ көстөр.  АПМ Gradо хампаанньа былырыын Томмот маастар-былаанын оҥорон, куорат хатыламмат көстүүтүн тупсаран, ситэрэн-хоторон биэрбитэ. Уопсастыбаннай эйгэни сайыннарыы кэнсиэпсийэтэ стратегическай докумуоҥҥа ыйылла сылдьар.

          Паарка бырайыагын оҥорууга библиотечнай-информационнай киин салайааччыта Виктория Смертина уонна олохтоохтор көхтөөх кыттыыны ыллылар.

         Ону таһынан, «Укулан» диэн дьон сынньанар киинин тутуута быйыл саҕаланыахтаах. 2022 с. Томмот табыгастаах куорат эйгэтин сайыннарыыга VII Бүтүн Арассыыйатааҕы куонкуруска кыттан, 80 мөл. солк. суумалаах федеральнай гыраан сүүйэн ылбыта. Киэҥ хабааннаах бырайыагы олоххо киллэрии быйыл саҕаланыа.

Томмот куорат баһылыга Александр Самарскай:

Пааркабытын саҥардыы үлэтин 2021 с. саҕалаабыппыт, тутуу 2022 с. түмүктэммитэ. Симиэтэбитин оҥорорго 2020 с. сыанаҕа тирэҕирбиппит, онтон табаар сыаната эмискэ ыараан хаалбыта.

Ол иһин бэдирээччит буларга, куонкурус ыытарга уустук этэ. Ылсыбыт дьыалабытын быраҕан кэбистэхпитинэ, федеральнай таһымҥа өтөрүнэн өйөбүл, үп-харчы ыларбыт саарбах курдуга.

Элбэх тутааччылары кытта кэпсэтэн, хата, биһиги дьолбутугар Гамлет Кочарян 2020 с. сыананан эбийиэктэри тутарга сөбүлэспитэ. Кини тутуу матырыйаалын атыылаһарыгар үп-харчы наада этэ.

Ил Түмэн урбааҥҥа, туризмҥа уонна инфраструктураны сайыннарыыга сис кэмитиэт бэрэссэдээтэлэ Игорь Григорьев киниэхэ бырыһыана суох уһун кэмҥэ кирэдьиит биэрэри туруорсубута. Онон Гамлет Кочарян тутуунан дьарыктанар хампаанньата паарка эбийиэктэрин саҥардар үлэни ыйыллыбыт болдьоххо бүтэрдэ, — диэн кэпсээтэ.

Кини Ирина Алексееваҕа, Ил Дархан архитектураҕа уонна куораты тутууга управлениетыгар, чуолаан  Алена Капитоноваҕа, Ирина Маркина салайааччылаах LETO компетенция киинигэр, бырайыактыыр архитектордарга Анку Гасич, Александр Игнатьевка, Иван Кычкиҥҥа, Елена Аммосоваҕа махталын биллэрдэ.