Уопсастыба

«Кыра куораттарга, нэһилиэктэргэ, кытыы оройуоннарга дьон тугу туруорсарын болҕомтоҕо ылыахтаахпыт», — диэн Арассыыйа бэрэсидьиэнэ Владимир Путин быйыл Санкт-Петербург куоракка буолбут Аан дойдутааҕы экэнэмиичэскэй пуорумҥа эппитэ.

ХИФУ аудиториятыгар Ашот Караханян, «Добро.Журнал» кылаабынай эрэдээктэрэ «Көрдөрөр-иһитиннэрэр сириэстибэлэри кытта алтыһыы. Социальнай бырайыактары медиаҕа уонна социальнай ситимҥэ таһаарыы» диэн маастар-кылаас тэрийэн ыытта. Кини кэммиэрчэскэйэ суох тэрилтэлэри киэҥ эйгэҕэ хайдах биллэр-көстөр оҥоруохха сөбүн туһунан кэпсээтэ, итиэннэ пиарщиктарга, пресс-сэкиритээрдэргэ дьон ааҕар тиэкиһин хайдах суруйуохха сөбүн туһунан билиһиннэрдэ.

«Аныгы киһи уһун-киэҥ суруйууну аахпат. Миэхэ биир а4 уһун тиэкиһи ыыттахтарына, ааҕа да барбаппын, үгүс дьон оннук гыналлар. Онон ууну-хаары куппакка, ордук-хоһу лэбийбэккэ сонуну кылгастык биэрэ үөрэниҥ, саамай уһаабыта 4 абзац. Ол иһигэр эспиэр кэмэнтээрийэ баар буолуохтаах.

Элбэх сыыппара, отчуот киһини сылатар, ону таһынан, дьоҥҥо өйдөнөр, судургу тылынан суруйуохтааххыт. Канцеляризм истиилинэн, официальнай тылынан кураанах этиини ким даҕаны аахпат. Дьон тиэкис туох иэйиини аҕаларын эрэ өйдөөн хаалар, онон суруйуугут иэйиилээх, дьону долгутар, чаҕылхай, харахха быраҕыллар, ураты буолуохтаах», — диэн эттэ Ашот Караханян.

Онлайн ситимҥэ үлэлиир медиаларга быһылаан, эбэтэр суолталаах түгэн буолбута муҥутаан чаас аҥаара ааспытын кэннэ сонун түргэнник тахсыахтаах. Сонуну сыыдамнык уонна кылгастык суруйар дьон түргэнник ТОП-ка тахсаллар. Сонуну бытааннык уонна хас да лиискэ халыҥнык, уһуннук, салгымтыалаахтык, официальнай тылынан биэрэр саайтары аахпаттар.

Биллэн турар, 3-4 чаастаах тэрээһини, суолталаах мунньаҕы баара-суоҕа 2000 знактаах бэрт кылгас, тэттик сонун оҥорон таһаарар уустук. PR-исписэлиис, пресс-сэкиритээр, суруналыыс ону сатыахтаахтар.

Маастар-кылаас спикерэ кимиэхэ анаан суруйар, кэпсиир аудиторияҕытын чопчу билиэхтээххит диир. Кини этэринэн, «В контакте» үксүн 24 саастарыгар диэри эдэр ыччат олорор, «Одноклассники» аҕа саастаах көлүөнэ. “Яндекс дзен” ыстатыйалары сөбүлээн ааҕар дьон бааллар.

Ашот Караханян: “30-44 саастаах дьон аһымал санаа аахсыйатыгар кэбэҕэстик кыттан, харчы угаллар, кыамматтарга көмөлөһөр дохуоттаахтар. Онон кинилэр интэриэстэрин табан суруйуохтааххыт. Пресс-сулууспа үлэһиттэрэ тэрилтэ уонна тус бэйэлэрин брендин сайыннарыахтаахтар, ханнык темаҕа эспиэр буолалларын быһаарыахтаахтар.

Сорохтор нэдиэлэҕэ биирдэ-иккитэ пресс-релиз ыытан баран биир ый сүтэн хаалаллар. Информационнай хонууга куруук баар эрэ дьону, тэрилтэни өйдөөн хаалаллар. Бэйэҕит ураты хаачыстыбаҕытын булан, хатыламмат, сонун, иэйиилээх, чаҕылхай контены биэрэ үөрэниҥ», — диэн сүбэлээтэ маастар-кылаас оҥорооччу.