Балаҕан ыйын 27 күнүгэр Саха Өрөспүүбүлүкэтин Судаарыстыбаннаһын Суверенитетын туһунан декларация ылыллыыта Саха Сирэ сайдарыгар саҥа олугу уурбута. Бу күн биһиги улуу дьоммут ааттарын ааттыыбыт. Былатыан Ойуунускай, Максим Аммосов, Исидор Бараахап, Степан Аржаков курдук уһулуччулаах дьоммут төһө даҕаны уустук кэмнэр турдаллар, олохтоох норуоттар көҥүллүк сайдар кыахтарын туһугар Өрөспүүбүлүкэни олохтообуттара. Биһиги бүгүн кинилэр кэс тылларын олоххо киллэрэн, өрөспүүбүлүкэбитин салгыы дохсуннук сайыннарабыт. Бары бииргэ – иннибит диэки! – диэн мустубут дьону эҕэрдэлээтэ СӨ Баһылыгын уонна Бырабыыталыстыбатын Дьаһалтатын салайааччы Георгий Михайлов.
Ил Түмэн Судаарыстыбаннай Мунньаҕын бэрэссэдээтэлин солбуйааччы Владимир Афанасьев мустубут дьону эҕэрдэлээн туран, өрөспүүбүлүкэни олохтообут улуу дьоммут суолларын салгыы тэлбит, 90-ус сылларга Өрөспүүбүлүкэ Судаарыстыбаннаһын туһунан Суверенитеты ылынан, саҥа Өрөспүүбүлүкэни олохтообут киһибитинэн Михаил Ефимович Николаев буолар диэн тоһоҕолоон бэлиэтээтэ. “Саҥа Өрөспүүбүлүкэ норуокка саҥа күүһү биэрбитэ, сайдыы саҥа тосхоллорун арыйбыта. Онон Саха Сирэ Арассыыйа састаабыгар биир саамай чаҕылхай алмаас буолан күлүмүрдүү сырдыы турар!” – диэтэ кини.
“Үөһээ Бүлүүлэр быйыл өрө көтөҕүллэн, Исидор Бараахап 125 сыллаах үбүлүөйүн бэлиэтиибит. Бүгүн Өрөспүүбүлүкэни олохтоспут улуу киһибитин чиэстээри мустан турарбыт ураты суолталаах. Ону кытта бүгүҥҥү ураты күн биһиги биир дойдулаахпыт Айсен Сергеевич Николаев иккистээн Ил Дархан солотугар киирэр үөрүүлээх тэрээһинэ буоларынан биһиги биир дойдулаахтара улаханнык киэн туттабыт!” – диэтэ Үөһээ Бүлүү баһылыгын эбээһинэһин толорооччу Семен Михалев.
-
0
-
0
-
0
-
0
-
0
-
0
