Бастакы боппуруоһунан ыраах сытар нэһилиэктэргэ кытаанах бөҕү хомуйарга эрэгийиэннээҕи операторы булууну судургутан биэрэр туһунан федеральнай сокуон бырайыагар уларытыыны киллэриини көрдүлэр. СӨ ОДьКХ уонна энергетика миниистирин солбуйааччыта Наталия Готовцева субъект бэйэтэ кытыы сытар нэһилиэктэр испииһэктэрин оҥорорун туһунан эттэ. Сис кэмитиэт сокуон барылын өйүүргэ куоластаата. Онон сыл бүтүөр диэри бастакы ааҕыыга ааһара күүтүллэр.
Салгыы Любовь Папок, СӨ кылаабынай архитектора өрөспүүбүлүкэҕэ куораты тутар бэлиитикэҕэ кэккэ уларытыылары киллэрэр туһунан сокуон барылын билиһиннэрдэ. Кини биир кэлим докумуон диэн саҥа өйдөбүл киирэрин, өрөспүүбүлүкэ боломуочуйата кэҥиирин туһунан кэпсээтэ.
Саха Сиригэр элбэх кыбартыыралаах дьиэлэргэ хапытаалынай өрөмүөн ыытарга СӨ сокуонугар уларытыыны киллэрэр туһунан сокуон барылын сис кэмитиэккэ көрдүлэр. Оччотугар хапытаалынай өрөмүөнү ыытар пуонда бэйэтэ тутуу матырыйаалын атыылаһар кыахтаныахтаах.
Ону таһынан, дьокутааттар сис кэмитиэт 2024 сыл бастакы аҥаарыгар ыытар үлэлэрин былаанын дьүүллэстилэр.
Эскроу счет көмөтүнэн дьон олорор дьиэтин тутууга тутуу бэдирээтин дуогабарын оҥорсорго федеральнай сокуон барылын, нэһилиэнньэни удамыр сыаналаах дьиэнэн хааччыйыы, хаарбах дьиэттэн дьону көһөрүү туһунан СӨ тутуутун миниистирэ Виктор Романов иһитиннэрдэ.
Кини этэринэн, хаарбах дьиэлээх дьоҥҥо саҥа дьиэ, эбэтэр толуйуу харчытын биэрэллэр. Холобур, саахалланар туруктаах эргэ самнархай дьиэ сыаната 3 мөл., оттон саҥа дьиэ сыаната 5 мөл., ол араастаһыытын толуйуу харчыны ылар киһи бэйэтэ уйунар.
Арассыыйаҕа хаарбах дьиэттэн дьону көһөрүү бырагыраама үһүс түһүмэҕин олоххо киллэрэргэ 3 трлн. солк. ордук үп ирдэнэр. Саха Сиригэр 2023 с. тохсунньу 1 күнүгэр 1 мөл. 260 тыһ. кв.м. иэннээх хаарбах дьиэ испииһэккэ киирбит. Дьокуускайга — 480 тыһ. кв.м. саахалланар туруктаах дьиэ көтүрүллүөхтээх. Бу үлэ 2030 с. диэри ыытыллыаҕа, итиниэхэ 80 млрд. Солк. ордук үп наада.
Норуодунай дьокутааттар бырагыраама ымпыгын-чымпыгын туоһуластылар, бырайыактыыр уонна смета оҥорор докумуону оҥоруу, 17 кыбаарталы көһөрүү о.д.а. ыйытыктары дакылаат оҥорор дьоҥҥо биэрдилэр.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Хаартыска: https://pravdapfo.ru/news/80210-chuvashiya-poluchila-210-mln-na
-
0
-
0
-
0
-
0
-
0
-
0
