Ийэ баар буолан олох салҕанар, удьуор ууһуур-тэнийэр, кэскилэ кэҥиир. Хас биирдии киһиэхэ саамай чугас киһитэ — ийэтэ, кини сылаас сыһыаныгар, истиҥ тапталыгар угуттанан, бастакы хардыыбытын оҥоробут, олох киэҥ аартыгар тахсабыт. Ийэбит аанньалбыт курдук үөрэр-хомойор кэммитигэр куруук аттыбытыгар баар буолар, мунчаардахпытына санаабытын көтөҕөр, сүрэхпитин уоскутар, өйдүүр-өйүүр, көмүскүүр-харыстыыр киһибит кини. Ийэбит минньигэс аһылыга оҕо саас умнубат өйдөбүлэ буолан өйбүтүгэр-санаабытыгар иҥэн хаалар.
Ийэлэрбит биһигини билиҥҥи курдук ийэ хапытаала, судаарыстыбаттан төлөнөр көмө харчыта, босхо бэриллэр сир учаастага, олоҕу чэпчэтэр аныгы тиэхиньикэтэ, оҕону аралдьытар аныгы гаджета суох улаатыннарбыттара. Ол саҕана подгузник эҥин суох буолан, кыһыл оҕо таҥаһын күҥҥэ сүүрбэччэтэ илиинэн сууйаллара. Тыа сиригэр хас биирдии ыал кырата 4-5 оҕолоох буолара. Аны үлэлээн кэлэн баран ынахтарын-сүөһүлэрин бэрийэллэрэ, сарсыарда күн тахсыыта ынах ыы тахсан, оҕолор уһукталларыгар күөрчэхтээх лэппиэскэ бэлэм буолара.
Онон тыа сиригэр ыарахан үлэни үлэлээн, эр киһи үлэтэ диэн толлон турбакка мас хайытан, оһох оттон, хаар күрдьэн, сайын эр дьону кытта тэҥҥэ оттоһон, кырбас курдук элбэх оҕолорун аһатан-таҥыннаран киһи-хара оҥортообут ийэлэрбитигэр ис сүрэхтэн сүгүрүйэбит, махтанабыт, таптыыбыт!
Сахабыт Сирин бары ийэлэригэр чэгиэн-чэбдик доруобуйаны, дьолу-соргуну, үлэҕэ ситиһиини баҕарабыт, чугас дьоҥҥут тапталларыгар куустаран, сүрэххит өрүү үөрүүнэн туоллун!
-
0
-
2
-
0
-
0
-
0
-
0
