Бу инники эппитим курдук харчыга харааччы иирбэккэ, үпкэ үрдэ суох үлүһүйбэккэ, баайга баламаттык таласпакка сиэрдээхтик, суобастаахтык, бэйэ бодону тардынан, киһилии майгыны өрө тутан сырыттахха хайа да түгэҥҥэ эркин курдук эрэллээх дьонноох-сэргэлээх буолаҕын диэн иитэр - үөрэтэр, эрэннэрэр, итэҕэтэр.
Киинэ сүҥкэн улахан дириҥ хорутуулаах, өлбөт -сүппэт өйдөбүллээх, киһини толкуйдатар үлэ буолбут диэн сыаналыыбын. Харчы баай-дуол, бастыҥ олох өттүн эрэ көрөн харах хараҥарыар, дууһа кураанахсыйыар, өй - санаа өлбөөрүөр диэри турукка киирэн дьайар дьайыыҥ хара дьай туругар киирэрин дьиҥ чахчы өйдүүр гына оҥоһуллубут. Онон киинэ сценарииһыгар уонна өрөсүссүөрүгэр барҕа махтал буоллун.
Киинэҕэ орто дойду олоҕун саамай аламаҕай, саамай истиҥ иэйиитэ таптал харчы хара дьайын кыайда! Онтон дьиҥнээх олоххо хайдаҕый? Дьэ этэргэ дылы биирдэ этэн кэбиспэт гына буккуурдаах-тэккиирдээх, утуйан турдах ахсын бөрүкүтэ суох балаһыанньалаах кэмҥэ олоробут. Муҥкук киһи муннукка анньыллан, буккумар киһи буола турарга буккуллан, саарбахтыыр киһи санааҕа баттатар кэмигэр харчы хараҥа өттүн талан. Ол гынан баран хайа да кэмҥэ, ханнык да күҥҥэ, дойду тутулуттан тутулуга суох толлон, турбакка өйүҥ -санааҥ дьэҥкэ, чөл чэгиэн туруктаах буоллахха дьон тэҥинэн олоруохха сөп. Маны киинэни уһулбут хамаанда олус итэҕэтиилээхтик, өйдөнүмтүө гына кыайа-хото туппут. Ол курдук үс бииргэ үөрэммит оҕолор сыһыаннара көстөр, Байдамнаах Юля тапталлара иэстэбил ыар тыынын уйда. Харчы хачыгырас тыаһа кыайа туппут сиригэр иэстэбил ир суолу ирдээн, тоҥ суолун тордоон ситэ баттаата... Ис хоһоонун барытын кэпсээбэппин, бэйэҕит көрөргүт ордук буолуо.
Киинэни устубут хамаанда, сериал сулууспата бар дьоҥҥо көмө-тирэх буолар үлэни оҥорбуттара дьон-сэргэ махталын ылара өссө да иннилэригэр турдаҕа.
Хаартыска: https://yk24.ru/
-
0
-
0
-
0
-
0
-
0
-
0
