Айыыһыт сылын арыллар аартыга, таҥха ыйын таайбараҥ тыына, тохсунньу ый толомон ньуура туманын быыһыгар тумарыгы тумуннаран, дьэҥкэрэн ыллын, толоос толоостук тыыммахалаабытын алы гыннаран ах бара түстүн, күлүмэх да түгэҥҥэ күлүм - мичил мичээрдээн сэбэрэлиин сэргэхситтин.
Саха санаалаах сарбыллыбат санаатынан анааран, туллаҥнаабат санаатынан туруулаһан, энчирээбэт санаатынан эллэхтэһэн, тулуйан, дьулуһан, олохтоохтук оҥостон, оҥкула хамсаабатын. Муҥкук санаа муннарар муҥугар муннукка мумматын, инники диэки барар аартыга арыллан, иҥнибэккэ, толлубакка суолун тобуллун.
Хайа да түгэҥҥэ түөрэҕэ түөрэҥнээбэтин, кэтэмэҕэйдээн - саарбахтаан, кэтэҕин тарбамматын. Ыксаллаах да кэмнэргэ, ыгылыйар да күннэргэ, ырааҕы ыралыырын ыһыктыбатын. Экчи диэн туран эккирэтиһэн, сырдыгы эрэ ыралаатахха, сандаарар саҕахтар арыллыахтара. Тургутуу кэмигэр тулуйбахтаһарга, сэргиир сэгэрдэрдэрдээх, кэрэхсиир кэккэлэһэ сылдьар дьонноох, тоҥолохтон тутуһар доҕордоох, алтыһар аламаҕай аймахтардаах, ылсар-бэрсэр ылбаҕай ыаллардаах, өй-санаа эбинэр өркөн өйдөөх үөлээннээхтэрдээх буолуоххайыҥ.
Үктэммит сылбыт үрдүккэ үктэл,
Саҕаламмыт сылбыт сырдык сыдьаай,
Кэлбит сылбыт кэскил кэрэһитэ буоллун!
Хаартыска:
https://yakutia.aif.ru/society/v_yakutii_v_den_100-letiya_respubliki_proydet_massovyy_horovod_osuohay
-
0
-
0
-
0
-
0
-
0
-
0
