Манна биэс экэнэмиичэскэй эҥээргэ арахсан, киин, соҕуруу, арҕаа, илин улуустар уонна Аартыка ойууламмыт. Каартаҕа хас биирдии улуус төрүт үгэстэрэ, туох айылҕа баайдааҕа, ханнык хамсыыр харамайдааҕа, киэн туттар эбийиэктээҕэ көстөр. Бачча улахан каартаны норуот маастардара илиилэрин сылааһын, төрөөбүт дойдуга истиҥ тапталы иҥэрэн оҥорбуттар. Каартаҕа 500 быысыбайдаммыт ойууну киллэрбиттэр, ону силигин ситэрэргэ сыл аҥаара үлэлээбиттэр.
«Содружество» айар бөлөх салайааччыта, Саха Сирин норуотун маастара, РФ уопсай үөрэҕин бочуоттаах үлэһитэ Людмила Жиркова. Бырайыагы олоххо киллэрээччи Саха Сирин норуотун маастара Ульяна Миронова, бырайыагы оҥорооччу СӨ Үтүөлээх архитектора Сергей Миронов, бырайыак худуоһунньуга Дьокуускай куорат 33 №-дээх оскуолатын технология, уруһуй ускуустубатын учууталларын түмсүүтүн салайааччыта Ньургуйаана Игнатьева.
Ил Түмэн бэрэссэдээтэлэ Алексей Еремеев айар бөлөҕү эҕэрдэлээн, кинилэргэ махтанан туран: «Сахабыт Сирэ талааннаах тарбахтаах маастардарынан киэҥник биллэр, илиинэн быысыбайдаан итиччэ улахан каартаны оҥорон таһаарарга үгүс-үтүмэн бириэмэ, сыра-сылба барар. Маннык уустук үлэ тулуурдаах буолууну эрэйэр, каартаҕа хас биирдии муниципальнай тэриллии туох ситиһиилээҕэ, төрүт култуурата көстөр.
Бырамыысыланнай оройуоннарга карьердар, улахан кыамталаах тиэхиньикэ ойууламмыт. Үүнэр көлүөнэҕэ эһиги сыралаах үлэҕит үтүө өйдөбүл буолан хаалыаҕа», — диэн эттэ.
Каартаны илиинэн быысыбайдаан таһаарбыт «Содружество» айар бөлөх салайааччыта, Саха Сирин норуотун маастара, РФ уопсай үөрэҕин бочуоттаах үлэһитэ, Учууталлар учууталлара Людмила Жиркова бырайыак хайдах саҕаламмытын туһунан кэпсээтэ.
Сахабыт Сирин быысыбайдаммыт каартата «Быысыбайдаммыт Арассыыйа» бэстибээлгэ 2023 с. Чебоксары куоракка кыттыбыта. 2022 с. Арассыыйа быысыбайдаммыт каартата оҥоһуллубута, онно 85 субъект киирбитэ, саамай улахан сирдээх-уоттаах Саха Сирэ ыраахтан көстөр, өрөспүүбүлүкэ былааҕар ыһыахха бар дьону түмэр аал-луук мас ойууламмыта. Атын өрөспүүбүлүкэлэр кыра сирдээх буолан, ытыс саҕа лоскуйга национальнай бэлиэлэрин оҥорбуттара.
Арассыыйа 3,3х6,7 иэннээх каартатыгар 1,5х1,5 таҥаска Саха Сирин быысыбайдыырга норуот маастардара баара-суоҕа биир ый кэриҥэ үлэлээбиттэрэ.
«Үлэбит болдьоҕо ыгым соҕус буолан, өссө да элбэҕи этиэхпитин ситэ эппэккэ хаалбыт курдук сананан, Арассыыйа быысыбайдаммыт каартатын көрөн баран Сахабыт Сирин каартатын оҥоруохпутун баҕарбыппыт.
Биһиги хамаандабыт бэйэ-бэйэтин ситэрсэн биэрэн, СӨ Үтүөлээх архитектора Сергей Миронов георграфическай хайысхалаах шаблон бэлэмнээн, каартабытын оҥордубут. Үлэбитигэр төрөөбүт дойдуга уҕараабат истиҥ тапталы иҥэрдибит.
Чебоксары куоракка Сахабыт Сирин быысыбайдаммыт каартатын илдьибиппитин бар дьон сөҕө-махтайа көрдө. Национальнай уус-уран түмэлгэ саамай элбэх көрөөччү биһиги каартабыт тула мустубута.
Атын эрэгийиэннэр дойдуларын устуоруйатын, төрүт үгэстэрин толору арыйар сыалтан төһө кыалларынан улахан кээмэйдээх каарта оҥорон, дьон болҕомтотугар таһаарбыттара. Үгүстэр каарталарын орто кээмэйдэрэ 2м. х 2м. курдук этэ», — диэн билиһиннэрдэ Людмила Жиркова.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
-
2
-
0
-
0
-
0
-
0
-
0
