Юрий Николаев, Ил Түмэн бэрэссэдээтэлин солбуйааччы, бүддьүөккэ, үпкэ-харчыга, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэт бэрэссэдээтэлэ Өлүөхүмэ өлгөм үүнүүлээх, быйаҥнаах буордаах тыатын хаһаайыстыбатын бородууксуйатын туһаҕа таһаарарга суол-иис хаһан оҥоһулларын ыйыталаста. Кини Өлүөхүмэттэн Сунтаарга, «Бүлүү» федеральнай айан суолугар тахсарга Кэмпэндээйигэ диэри суол тутуллуохтааҕын бэлиэтээтэ. Ону таһынан, Уус Алдан муниципальнай суолун өрөспүүбүлүкэ бас билиитигэр көһөрүү хаһан ыытыллыан сөбүн сураста.
Ольга Рафаилова этэринэн, «Умнас» эрэгийиэннээҕи суолга Хаҥалас улууһугар Тиит Арыыттан Тумулга диэри суолу салгыы оҥорорго бырайыага, сметата чуолкайданыахтаах. Өлүөхүмэ чугаһынан суолу оҥороллор, куоракка бетон бүрүөһүн кутуллуохтаах. Оттон Дьокуускай Өлүөхүмэ икки ардыгар суол хаһан оҥоһуллара уустук боппуруос, уонунан миллиард үп ирдэнэр. Аҥаардас Сиинэ өрүһү туоруурга күргэ тутарга, барыллаан ааҕыынан, үс миллиард солк. наада.
Өлүөхүмэ уонна Сунтаар икки ардынааҕы суол тутуутугар быйыл суол эрэгийиэн бас билиитигэр киирэн, үп-харчы көрүллүөхтээх. Уус Алдан суолун өрөспүүбүлүкэ бас билиитигэр биэрэргэ икки улуус суола оҥоһуллуохтаах. Оччотугар Таатта уонна Уус Алдан нэһилиэктэрин икки ардыгар суол аһыллыахтаах.
Хаартыска: youtube.com
-
0
-
0
-
0
-
0
-
0
-
2
