Уопсастыба

Сунтаар улууһун Аллыҥа нэһилиэгэр уонна Ньурба Малдьаҕарыгар кыраадыстаах утаҕы атыылыыры кытаанахтык бобор туһунан сокуон барылын нэһилиэк дьокутааттарын Сэбиэтэ киллэрбит. Манна даҕатан эттэххэ, олохтоох былаас нэһилиэги арыгы атыытыттан толору босхоломмут сиринэн биллэрэр бырааптаах.

Аллыҥа баһылыга Николай Спиридонов этэринэн, күн бүгүн нэһилиэккэ 430 киһи олорор, онтон 218 эр киһи, 212 дьахтар. Нэһилиэнньэ санаатын үөрэтии түмүгэр дьон-сэргэ чөл олохтоох, чэгиэн туруктаах, сиэр-майгы өттүнэн чэбдик буоларын туһугар кыраадыстаах утах атыытын боборго быһаарыммыттар.

Эмиэ итинник үтүө холобуру батыһан, Ньурба улууһун Малдьаҕар нэһилиэгэр итирдэр утаҕы, ол иһигэр пиибэни атыылыыры бобор туһунан сокуон барылын нэһилиэк дьокутааттарын Сэбиэтэ бэлэмнээбит. Малдьаҕар баһылыга Александр Степанов иһитиннэрбитинэн, нэһилиэккэ 516 киһи олорор.

Кини Малдьаҕарга сотору кэминэн «Основа» алкомаркет салаата аһыллыахтааҕын, оттон чааһынай урбаанньыттар лицензиялара суох буолан кыраадыстаах утаҕы атыылыыр кыахтара суоҕун туһунан билиһиннэрдэ. Нэһилиэнньэ уонна үүнэр көлүөнэ ортотугар чөл олоҕу олохтуурга, сокуону кэһиини сэрэтэргэ итирдэр утах атыытын толору боборго олохтоохтор санааларын эппиттэр. Сокуон барыла онно олоҕуран оҥоһуллубут.

СӨ Урбаанын миниистирэ Тимур Ханды: «Атыы-эргиэн ити көрүҥүнэн дьарыктанарга күн бүгүн өрөспүүбүлүкэҕэ 429 юридическэй сирэй лицензиялаах. Кыраадыстаах утаҕы атыылыыр маҕаһыын социальнай эбийиэккэ, оскуолаҕа диэри хас миэтэрэ тэйиччи турарын муниципальнай тэриллии дьокутааттара быһаараллар. Холобур, Дьокуускайга 300 миэтэрэ диэн олохтоммута.

Кыраадыстаах утаҕы атыылыыр уопсастыбаннай аһылык тэрилтэлэрэ 75 кв. м. иэннээх саалалаах буолуохтаахтар, улуустарга 50 кв.м. Онтон кыра саалалаах кафелар итинник утаҕы атыылыыллара бобуллар», — диэн быһаарда.  

Кини уопсастыбаннай аһылык тэрилтэлэригэр кыраадыстаах утаҕы бобор боломуочуйа суоҕун бэлиэтээтэ.

Малдьаҕарга аһыллыахтаах «Основа» ХЭТ арыгыны атыылыырга 2023 с. лицензия ылбыт, өскөтүн сокуон ылыллан, балаҕан ыйын 1 күнүгэр олоххо киирдэҕинэ, ол лицензията сотуллар эбит.  

Норуот дьокутаата Иван Данилов нэһилиэк дьокутааттарын өйүүргэ ыҥырда уонна Дьокуускайга Гагаринскай уокурукка арыгыны атыылыр туочука элбэҕин туһунан эттэ. «Саҥа дьон» фракция салайааччыта Ньургуйаана Заморщикова оскуола оҕолоро үлүһүйэллэринэн сибээстээн, Борисов урбаанньыт оҥорбут быыппаҕын боборго этии киллэрдэ.  

Онуоха миниистир Тимур Ханды СӨ Тыатын хаһаайыстыбатын кытта бииргэ үлэлэһэн, лабораторнай аныылыс оҥоһуллан, быыппах ханнык көрүҥҥэ киирэрэ быһаарыллыахтааҕын туһунан эттэ.

Ол туһунан сиһилии «Ил Түмэн» хаһыат кэлэр нүөмэригэр ааҕыҥ.