Кистэл буолбатах, быраап эйгэтигэр туттуллар нууччалыы тылы хаһыат аайы тус-туһунан тылбаастаан таһаарыахтарын сөп, оттон тылдьыт баара тиэрмини сахалыы сөпкө суруйарга сүрүн тирэх буолар. Маннык сүҥкэн суолталаах тылдьыт «Саха Өрөспүүбүлүкэтин судаарыстыбаннай тылларын харыстааһын уонна сайыннарыы» диэн судаарыстыбаннай бырагыраама көмөтүнэн күн сирин көрдө.
Бу кинигэ «Ил Түмэн» издательскай дьиэ”, СӨ инновацияҕа, сыыппара сайдыытыгар уонна инфокоммуникация технологияларыгар министиэристибэтин өйөбүлүнэн 1000 тираһынан бэчээттэннэ. Тылдьыкка Арассыыйа быраабын эйгэтигэр туттуллар 8000 тыл киирдэ, РФ уонна СӨ ситэриилээх былааһын уорганнарын аата сахалыы хайдах суруллара ыйылынна.
Тылдьыты тыл үөрэхтээхтэрэ уонна учуонайдар, юристар күүстэрин түмэн оҥордулар, сүрүн эрэдээктэр, тылбаасчыт Афанасий Гуринов – Арчылан, научнай эрэдээктэр Лидия Манчурина, ХИФУ РФ хотугу-илин норуоттарын тылларын уонна култуураларын институтун саха тылын стилистикатын уонна нууччалыы-сахалыы тылбаас хаапыдыратын сэбиэдиссэйэ.
«Ил Түмэн» издательскай дьиэ” шеф-эрэдээктэрэ Галина Бочкарева тылдьыт хайдах оҥоһуллубутун, ким үлэлэспитин билиһиннэрдэ. Бу бырайыагы олоххо киллэрэргэ 2016 с. Чебоксары куоракка тахсыбыт «Быраап билиитин нууччалыы-чуваштыы тылдьыта» холобур буолла.
Сүрүн эрэдээктэр Афанасий Гуринов – Арчылан бэйэлэрэ тус үлэлээх эрээри, сүрэх баҕатынан «Быраап билиитин нууччалыы-сахалыы тылдьытын» оҥорбуттарын, онуоха сөптөөх өйөбүл, үбүлээһин көстүбүтүн бэлиэтээтэ.
«Быраап-сокуон эйгэтигэр саха тыла олохтоохтук уонна кэлимник туттулла илик. Кэнники сылларга эрэ хамсааһын тахсан эрэр. Холобур, киэҥ эйгэҕэ сөбүлэһии, сөбүлэҥ, дуогабар диэни ис хоһоонун араарбакка эрэ туттуу эмиэ баар. Быраап эйгэтигэр барыта чопчу уонна дьэҥкэ буолуохтаах. Биһиги эрдэ тахсыбыт тылдьыттары кытта тэҥниир, ырытар үлэни оҥордубут. Элбэх сонун түгэннэр эмиэ бааллар, холобур гражданин диэн дойдулаах, дознаватель – токкоолооччу, сертификат – туоһу», — диэн кини тылдьыкка киирбит тыллары ааттаталаата.
СӨ Бырабыыталыстыбатын бэрэссэдээтэлин солбуйааччы Анатолий Семенов бу тылдьыт инникитин оскуолаларга, бибилэтиэкэлэргэ тиийэрэ наадалааҕын туһунан эттэ. Кини элбэх киһи туһаннын диэн тылдьыты электроннай көрүҥүнэн таһаарыан баҕарбытын, онтон бастакы хардыы типографияҕа кинигэ быһыытынан бэчээттэнэн тахсан, үйэлэргэ хаалара ордугун иһитиннэрдэ. Ону таһынан, тылдьыт күн сирин көрөрүгэр кылааттарын киллэрбит дьоҥҥо: Ил Түмэн дьокутааттарыгар, «Ил Түмэн» издательскай дьиэ» генеральнай дириэктэригэр Мария Христофороваҕа махтанна. Мария Николаевна аҕата адбакаат идэлээҕин билиһиннэрдэ.
Анатолий Семенов «Быраап билиитин нууччалыы-сахалыы тылдьыта» тахсарыгар үлэлэспит дьоҥҥо махтал суруктары туттартаата, ол иһигэр «Ил Түмэн» издательскай дьиэ” шеф-эрэдээктэригэр Галина Бочкареваҕа, бырайыактары сүрүннээччигэ Василий Прокопьевка.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
-
2
-
0
-
0
-
0
-
0
-
0
