Саха Сирин олохтоохторугар урукку өттүгэр Зураб Церетели скульптор быһыытынан биллэр эбит буоллаҕына, аан бастакы күүтүүлээх быыстапката аатырбыт монументалист-худуоһунньук өссө биир өрүтүн арыйда. Аны кини айылҕаттан бэлэхтээх, айар куттаах, ураты суоллаах график быһыытынан көһүннэ. Хайдах эрэ санаабар, түмэлгэ киирэн иһэн кырачаан скульптуралары көрөрүм буолуо дии күүппүтүм олох атын буолла. Хас биирдии хартыыната Церетели төрөөбут дойдутугар, итии күннээх Грузияҕа анаммыт. Ол курдук, ааптар олоҕун биир Грузиятааҕы кэрчигин ойуулуур-дьүһүннуур ускуустуба графика курдук уустук көрүҥүнэн туойбут. Чахчы даҕаны, уһулуччу дьоҕурдаах худуоһунньук ураты суолун, буочарын итиэннэ бөлөһүөктүү олоҕу ойуулуурун манна көрдүм.
Ааптар айымньытын сүрүн тосхоло барыта боростуой норуот күннээҕи олоҕор анаммыт. Күннээх Грузия курдук кэрэ үрдүк хайаларын быыһынан төрөөбүт норуотун күннээҕи олоҕун-дьаһаҕын киэргэппэккэ, хайдах баарынан ытыска ууран көрдөрөр гына суруллубут. Хас биирдии хартыына туспа ураты эйгэлээх. Экспозиция биир бөлөҕө библейскэй сюжеттарга уонна харандааһынан суруллубут графикаҕа туһуламмыт. Сиһилии өйдөөн көрдөххө, хас биирдии айымньы бэйэтэ туспа майгылаах, уобарастардаах... Кырдьык даҕаны, Зураб Церетели төрөөбүт дойдутугар тапталын уонна кини дьылҕатыгар истиҥник долгуйарын быыстапканы көрбүт киһи эрэ барыта бэлиэтиир буолуохтаах.
Экспозиция сүрүн ис хоһооно хас биирдии киһини долгутар тыын суолталаах. Холобур, хартыыналарга киһи уонна айылҕа, эр киһи уонна дьахтар, таҥара уонна киһи, киһи уонна кини майгыта ойууланаллар. Бу улахан норуот мындыр өйүн библейскэй устуоруйа сюжеттарынан аан дойду ойуулуур-дьүһүннүүр ускуустубатын бары эпохаларын холбоон көрдөрөр. Хас биирдии киһи Церетели графикатын көрөн баран, ону араастаан ылыныан сөп.
Альбина ПАВЛОВА
Ааптар хаартыскаҕа түһэриилэрэ
- 4
- 0
- 0
- 0
- 0
- 0