Александр Федотов, СӨ инновацияҕа, сыыппара сайдыытыгар уонна инфокоммуникация технологияларыгар миниистир солбуйааччыта төрөөбүт тылы харыстааһын судаарыстыбаннай сорук буоларын бэлиэтээтэ. Кини саха тыла киһи илиитинэн тутар-хабар кинигэтигэр киирэн, үйэтитилиннэҕинэ салгыы сайдар саргылааҕын уонна инникитин тиэхиньиичэскэй тиэрминнэр тылдьыттарын бэлэмниир тоҕоостооҕун туһунан эттэ.
Александр Ким-Кимэн, Арассыыйа юристарын түмсүүтүн Саха Сиринээҕи салаатын бэрэссэдээтэлэ, юридическай билим дуоктара, ХИФУ юридическай факультетын бэрэпиэссэрэ, Ил Түмэн III, IV, V ыҥырыылаах мунньаҕын дьокутаата инникитин уу сахалыы кэпсэтэргэ олук буолар тылдьыт тахсыбытыттан ис сүрэхтэн үөрэрин биллэрдэ.
«Сорох дьон төрөөбүт тылларын билбэттэр, онтон кыбыстан, тохтоон хаалар сыыһа. Холобур, Анатолий Аскалонович урут нууччалыы эрэ саҥарар этэ, билигин сахалыы эмиэ санаатын этэр. Кини СӨ инновацияҕа, сыыппара сайдыытыгар уонна инфокоммуникация технологияларыгар миниистиринэн, онтон СӨ Бырабыыталыстыбатын бэрэссэдээтэлин солбуйааччытынан үлэлии сылдьан бу улахан бырайыагы өйөөбүтүгэр махтал буолуохтун!
Мин эмиэ дьон иннигэр урут уу сахалыы тыл этэр кыаҕым суох этэ. Төрөөбүт тылбын дьиэ иһигэр эрэ туттарым, онтон бэлиитикэ, быраап тиэрминнэрин ыллыҥ да сахалыы саҥардыбаккын.
Онон юридическэй тиэрминнэр тылдьыттарын оҥорбут дьон Афанасий Гуриновка – Арчылаҥҥа, научнай эрэдээктэр Лидия Манчуринаҕа уонна бырайыагы көҕүлээччигэ Мария Христофороваҕа, Галина Бочкареваҕа махтаныах тустаахпыт. Ил Түмэн 30 сылыгар бэртээхэй бэлэх таҕыста», — диэтэ бэрэпиэссэр.
Кини тылдьыты оҥорбут дьону кэлтэйдии кириитикэлииртэн туох да үтүө тахсыбатын этэн туран, инникитин тирааһын улаатыннаран хос таһаарарга этии киллэрдэ. Оттон сэмэлиир дьон аҥаардастыы куолулуу олорбокко айар бөлөххө киирэн, тылдьыты тупсарарга үлэлэһэллэригэр ыҥырда.
Сокуоннары икки тылынан
Алексей Ефимов, СӨ Конституционнай Сүбэтин бэрэссэдээтэлин солбуйааччы тыл үөрэхтээх уонна юрист идэлээх дьон санааларын түмэн үлэлээтэхтэринэ, тиэрмин ис хоһоонун сөпкө биэрэллэрин бэлиэтээтэ. Кини Арассыыйа 22 национальнай өрөспүүбүлүкэтиттэн үһүгэр эрэ Татарстаҥҥа, Тываҕа уонна Саха Сиригэр сокуону икки судаарыстыбаннай тылынан ылыналларын иһитиннэрдэ.
Манна даҕатан эттэххэ, 2022 с. СӨ автономиятын 100 сылыгар Ил Дархан Айсен Николаев көҕүлээһининэн, 2023 сылтан сокуону ылыныы икки судаарыстыбаннай тылларынан тэҥҥэ оҥоһуллуохтааҕын туһунан сүҥкэн суолталаах өрөспүүбүлүкэ сокуона ылыныллыбыта.
Онон сокуон барылын Ил Түмэҥҥэ икки тылынан эрэ киллэрдэххэ, парламент көрүүгэ ылынар, итинтэн сиэттэрэн, тылбаас үлэтэ күүһүрдэ, тылдьыт тоҕоостоох кэмҥэ таҕыста.
-
1
-
0
-
0
-
0
-
0
-
0
