Манна даҕатан эттэххэ, кыраадыстаах утаҕы атыылааһын бириэмэтин уонна быраабылатын федеральнай сокуон хонтуруоллуур эрээри, эрэгийиэннэр ону бэйэлэрэ быһаарыахтарын сөп. Холобур, Саха Сиригэр үгүс улуустарга хас даҕаны нэһилиэк арыгыны атыылыыртан аккаастанан, нэһилиэктэрин чөл олох сиринэн биллэрбиттэрэ.
«Саҥа дьон» фракция салайааччыта Ньургуйаана Заморщикова элбэх оҕолоох ийэ быһыытынан, оскуола оҕолоро быыппаҕынан үлүһүйэллэрин иһин Борисов урбаанньыт оҥорор быыппаҕын боборго этии киллэрдэ. Быыппах диэнинэн атын утаҕы атыылыылларын, ону дьон билэ-билэ билбэтэҕэ буолалларын эттэ. Аны Дьокуускай куорат килбэйэр киинигэр, Орджоникидзе болуоссакка кыраадыстаах утаҕы атыылыыр хас да туочука баарын хомуруйда.
Онуоха СӨ Урбаанын миниистирэ Тимур Ханды СӨ Тыатын хаһаайыстыбатын кытта бииргэ үлэлэһэн, лабораторнай анаалыс оҥоһуллан, быыппах ханнык көрүҥҥэ киирэрэ быһаарыллыахтааҕын туһунан эттэ. Итирдэр утаҕы атыылыырга лицензия федеральнай сокуоҥҥа олоҕуран бэриллэрин чопчулаата. Кини Урбаан министиэристибэтэ хонтуруоллуур уорган буолбатаҕын, күн бүгүн быыппах бобуллар утах ахсааныгар киирбэтин санатта.
Ону таһынан, сокуоннай саастарын ситэ илик оҕолорго энергетическэй утах атыытын бобор туһунан федеральнай сокуон барылын сис кэмитиэккэ көрдүлэр.
Дьокутааттар энергетическэй утах ахсааныгар быыппаҕы киллэриэххэ сөбүн, хас кыраадыстааҕын кэмнээн баран саатар оскуола оҕолоругар бобор оруннааҕын бэлиэтээтилэр.
Бобуллар утах минньигэс
Норуот дьокутаата, «Мирмилк» Мииринэйдээҕи үүт собуотун дириэктэрэ Татьяна Шарова онлайн холбонон: “Өскөтүн быыппах кыра кыраадыстаах утах буолара билиннэҕинэ, 18 саастарыгар диэри оҕолорго атыылыыр бобуллар. Дьокуускайга ас-үөл технологиятын сайыннарыы киинэ баар. Кинилэр быыппах ханнык көрүҥҥэ киирэрин, туох састааптааҕын быһааран биэриэхтэрин сөп дии саныыбын», — диэтэ.
* * *
Дьүүллэһии түмүгүнэн докутааттар сис кэмитиэккэ киирбит сокуоннар барылларын өйүүргэ куоластаатылар. Мин санаабар, чөл олоҕу өрө тутууну күүһүрдэн, табахтаабат, пиибэлээбэт дьону атыттарга холобур оҥорон, анаан бириэмийэлиир, бэлиэтиир, үтүө түмүктээх буолуон сөп. Дьиҥэр, чөл олоҕу тутуһар киһини үлэлиир тэрилтэтэ хайдах баҕарар өйүүр кыахтаах.
-
0
-
0
-
0
-
0
-
0
-
3
