Дьиэлэр түннүктэрин сабар муустаах уу түүн эмискэ халыйан кэлбитэ, кыыллахтары хабыс хараҥаҕа банаар уотун кыламнатан, эрэһиинэ тыынан, онтон бөртөлүөтүнэн эвакуациялаабыттара. Бу ыксаллаах ыарахан кэмҥэ өлүөхүмэлэр бары түмсэн, күүс-көмө буоллулар.
Бэҕэһээ, ыам ыйын 31 күнүгэр Өксөкүлээх Өлөксөй аатынан норуот айымньытын киинигэр аһымал санаа кэнсиэрэ буолан ааста. Саха эстрадатын ырыаһыттара Анастасия Готовцева, Аскалон Павлов, Ника,
Эрчим, Санита Ай, Анатолий Горохов, Айгылаан уо.д.а. кэнсиэртэн киирбит харчыны халаан уутуттан эмсэҕэлээбит дьоҥҥо ыытыахтара.
Кэнсиэр быыһыгар гуманитарнай көмөнү тэрийиигэ үлэлэспит дьону сыанаҕа ыҥыран таһааран, махтал тылларын эттилэр. Ил Түмэн дьокутаата Николай Кульбертинов халаан уута саба халыйан кэлбит ыксаллаах кэмигэр биир дойдулаахтарын кытта көрсүбүтүн, миэстэтигэр Бырабыыталыстыба хамыыһыйата тэриллэн үлэлээбитин туһунан иһитиннэрдэ.
Кини Ил Дархан Айсен Николаев маннык ыарахан кэмҥэ өрөспүүбүлүкэ олохтоохторо бары биир сомоҕо буолан, бэйэ-бэйэбитин өйөһө сылдьыахпыт диэн эппитин санатта. Николай Кульбертинов: «II Нөөрүктээйиттэн Кыыллаах Арыыга кэлэр уот ситимин көмүөл мууһа тоҕо көтөн алдьаппытын икки-үс ый иһигэр чөлүгэр түһэрэргэ үлэ барыаҕа. Үрдүк күүрүүлээх уот Кыыллаах Арыы нөҥүө Даппарайга кэлиэхтээх”, — диэн эттэ.
Ил Түмэн хотугу аҕыйах ахсааннаах норуоттар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева кэргэнэ өҥ-быйаҥ буордаах Өлүөхүмэттэн төрүттээҕин, үс кыыстаахтарын, ортоку кыыс Өлүөхүмэҕэ күн сирин көрбүтүн туһунан кэпсээтэ.
Норуот дьокутааттара халаан уутуттан эмсэҕэлээбит биир дойдулаахтарыгар ыарахан кэмҥэ бары өттүнэн күүс-көмө буола сылдьаллар, кинилэр бу ыксаллаах кэмҥэ күнүстэри-түүннэри сүүрбүт-көппүт дьоҥҥо махтал суруктары туттартаатылар. Дьокуускай куорат Дууматын дьокутаата Наталья Луковцева гуманитарнай көмөнү хомуйууга, тиэрдиигэ хара маҥнайгы күнүттэн көхтөөхтүк үлэлэспит биир дойдулаахтарын махтал суругунан бэлиэтээтэ.
Айылҕа алдьархайын кэнниттэн нэһилиэктэри чөлүгэр түһэриигэ билигин даҕаны көмө наада, онон бу хайысханан үлэ син биир салҕанар.
-
4
-
1
-
0
-
0
-
0
-
0
