Амма улууһун култуураҕа уонна норуот айымньытыгар управлениетын салайааччыта Иван Иванов сырдатар: “Күн бүгүн ыһыах бырагыраамата өрөспүүбүлүкэтээҕи хамыыһыйанан бигэргэтиллэн турар. Ол быһыытынан үлэ барар. Бэс ыйын 19 күнүгэр биһиэхэ быыстапкалар аһыллаллар. Олоҥхо Ыһыаҕар ананан тахсыбыт хас да кинигэ сүрэхтэниитэ, улууска олоҥхо сайдыытыгар улахан кылаатын киллэрбит педагог-настаабынньык Анисия Даниловна Софронова пааматынньыгын арыйыы, уустар түһүлгэлэрин арыллыыта уонна да атын тэрээһиннэр буолуохтара.
Ону сэргэ биир саамай долгутуулаах сиэр-туом, күнү көрсүү ыытыллыа. Дьэ, онтон бэс ыйын 20 күнүгэр күнүс 11 чаастан үгэс быһыытынан «Саҥарар саҥам сататын, этэр тылым эгэлгэтин эридьиэстээҥ» диэн ыһыахпыт аһыллыыта буолар. Бэс ыйын 21 күнүгэр киэһэ 6 чаастан ыһыахпытын үөрүүлээхтик сабыахпыт уонна ыһыах ытык дуоҕатын Нерюнгри улууһун дэлэгээссийэтигэр туттарыахпыт. Тоҕо диэтэр, билэргит курдук, кэлэр сылга Олоҥхо ыһыаҕа Нерюнгри улууһугар ыытыллар.
Быйылгы ыһыахпыт аһыллыытын сиэрин-туомун режиссера, биир дойдулаахпыт, өрөспүүбүлүкэ ускуустубатын үтүөлээх диэйэтэлэ - Мария Маркеловна Маркова, театрализованнай туруоруутун режиссера, бары ытыктыыр киһибит, Саха цииркэтин дириэктэрэ - Сергей Васильевич Расторгуев. Манна биһиги Үстүүн Нохсоороп “Дыырай Бэргэн” олоҥхотун сюжетыгар олоҕуран үгэс буолбут ньыманан олоҥхону толоруохпут, онтон ол толорууну артыыстар оонньоон көрдөрүөхтэрэ. Маннык олоҥхону толоруу өссө ханна да буола илик. Көннөрү театрализованнай эрэ буолар этэ. Бу үлэбит научнай сүбэһитэ, Үстүүн Нохсоороп айымньыларын чинчийэн үөрэтэр Виктория Георгиевна Григорьева буолар. Кини билигин биһиэхэ барыбытыгар Үстүүн Нохсоороп үстүү охсуулаах тойугун үөрэтэ сылдьар. Ол курдук, тоҕус олоҥхоһут олоҥхолуу, кэпсии олоруоҕа, ол кэмҥэ ол кэпсииллэрэ, олоҥхолууллара барыта театрализацияланан көстүөҕэ. Дьэ, ити ыһыахпыт аһыллыытын уратыта буолуо. Онтон ыһыах сабыллыытын режиссерунан Павел Колесов буолар. Онон бу тэрээһиннэр эмиэ олох ураты буолуохтара диэн күүтэбит. Манна арыллыыга 1300 киһи кыттара күүтүллэр. Сотору кэминэн репетициялар саҕаланыахтара. Бэс ыйын 3 күнүттэн мас уустара кэлэннэр, олоҥхо дьоруойдарын маска кыһан оҥоро бүттүлэр. Кинилэр үлэлэрин ыһыахха кэлбит дьон сэргии көрүөхтэрэ диэн эрэнэбит”.
“Амма олоҕо” хаһыат
-
0
-
0
-
0
-
0
-
0
-
0
