От ыйын 23 күнүн сарсыарда туругунан баһаар олорор дьиэлэртэн 600 миэтэрэҕэ сытар. Баһаар иэнэ 57 486 гектарга тиийдэ.
«От ыйын 23 күнүн сарсыарда 4:00 чаас туругунан, баһаар Киэҥ Күөл нэһилиэгиттэн 600 миэтэрэ тэйиччи сытар, 42 киһи көһөрүллүбүт. Бу кэмҥэ быыһааччылар баһаары утары уот ыыталлар. Уоту умуруорууга олохтоох нэһилиэнньэни киллэрэн туран, 50-ча киһи уонна түөрт тиэхиньикэ үлэлииллэр», — диэн Биир кэлим диспетчерскэй сулууспа иһитиннэрдэ.
Өссө биир ойуур баһаара Абый улууһун киинигэр, Белай Гора бөһүөлэгэр, кутталы үөскэтэр. Баһаар бөһүөлэктэн биэс килэмиэтирдээх сиргэ баар, баһаар иэнэ - 12181 гектар. Минерализацияламмыт балаһа тардыыга үлэ барарын суһал көмө сулууспалара бэлиэтээтилэр.
Киэҥ Күөл сэлиэнньэтэ - Уолбут нэһилиэгин административнай киинэ. Белай Гора бөһүөлэгиттэн 80 килэмиэтиргэ турар. Нэһилиэккэ 200-чэ киһи олорор.
Белай Гора бөһүөлэгэ - 1,9 тыһ. нэһилиэнньэлээх Абый улууһун административнай киинэ.
-
0
-
0
-
0
-
0
-
2
-
0
