Уопсастыба

ххх

Ил Дархан Арассыыйа биир көрсүһүүгэ Саха Сириттэн сылдьар буойуннарбытыгар  доруоп саалары уонна дроннары туттартаата.

Бу саас Саха Сирин олохтоохторо доруоп саалары хомуйар анал аахсыйа кэмигэр бэйэлэрин баҕа өртүлэринэн аҕалан туттартаабыттара. Икки нэдиэлэ устатыгар ыытыллыбыт аахсыйа кэмигэр сүүһүнэн доруоп саа хомуллубут

 Ил Дархан биир дойдулаахтарбытыгар анаан: “Cаха Сирин олохтоохторо баҕа санааларынан туттарбыт саалара Кыайыыны чугаһаттын. Маннык бары бииргэ тутуһан, түмсүүлээх буоллахпытынан биһиги кыайыахпыт!”, -диэн ыҥырда.    

Доруоп саа өстөөх дроннарын утары бэрт көдьүүстээх, онон буойуттарга олус наадалаах.  

 Бу көрсүһүүгэ Ил Дарханы кытта Арассыыйа сэриилэрин Илиҥҥи группировкатын хамаандыырдара сырыттылар.

ххх

Ону тэҥэ, Айсен Николаев биир тирэх пууҥҥа сылдьан, көрсүһүү кэмигэр буойуттарга саҥа тиэхиньикэни уонна гуманитарнай көмөнү туттарда.  Ол курдук, Саха Сиригэр оҥоһуллубут  «Якт-Сокол» квадроцикл күлүүстэрин байыастарга туттарарыгар: “ Арассыыйа көҥүлүн уонна кэскилин иһин дьоруойдуу киирсэ сылдьар хорсун санаалаах буойуттарбытыгар дириҥ махталбытын тириэрдэбин!  Эһигини кытта тэҥҥэ бастакы эрээккэ Саха Сирин буойуттара киирсэллэриттэн биһиги киэн туттабыт уонна кэтэһэбит. Саха Сирэ боруоҥҥа наадалаах бородууксуйаны оҥорууну өссө элбэтиэҕэ, күүһүрдүөҕэ. Өрөспүүбүлүкэбит бириэндинэн биллибит “Сокол” квадроцикллары таһынан, билигин электрматаһыыкыллары, бэйэтэ көтөр ааллары, аһылык бородууксуйатын, анал тэриллэри, таҥаһы ыыта турабыт, салгыы өссө улаатыннарыахпыт.  Саха Сирин олохтоохторо “Туох барыта боруоҥҥа, туох барыта Кыайыы туһугар!”  диэн боруоҥҥа көмөлөһө, өйүү туруохпут!”, - диэн бэлиэтээтэ.

Кутузов уордьаннааах мотострелковой  дивизия хамандыырын солбуйааччыта Ил Дарханы кытта көрсүһүүгэ: “Илиҥҥи байыаннай  уокурук сэрииһиттэрин байыастарыгар аармыйаҕа куруук көмөлөһөр, өйүүр Саха Сирин салалтата уонна олохтоохторо чугас, аймах курдук ылынар дьоммутунан буолаҕыт ”, -диэн дириҥ махталын биллэрдэ.  

Байыастар төрөөбүт Сахаларын Сиригэр, биир дойдулаахтарыгар эҕэрдэлэрин, махталларын ыыттылар.

ххх

Салгыы өрөспүүбүлүкэ Ил Дархана бэйэтэ көтөр ааллар оператордарын бэлэмниир оскуолаҕа сылдьан аныгы технологиялары, саҥа моделлары, байыаннай электроника сайдыытын кытта билсистэ.

Полигоҥҥа ыытыллыбыт көрсүһүүгэ оскуола  хамаандыбаньыйата уонна  инструктордара Айсен Сергеевичка Саха Сириттэн сылдьар байыастар саҥа байыаннай исписэлиинэстэрин хайдах ылыналларын, бэлэмнэнэллэрин көрдөрдүлэр.    

ххх

Ил Дархан Саха Сирэ шефтэһэр Докучаевскай куоратыгар сылдьан, өрөмүөннүүр-чөлүгэр түһэрэр үлэлэр хайдах ыыталлан иһэллэрин кытта билсистэ. Үлэлэр  сүрүннээн социальнай  уонна инфраструктуралаах эбийиэктэргэ уонна олорор дьиэлэргэ ыытыллаллар.

Ил Дархан бэлиэтээбитинэн, өрөмүөннүүр-чөлүгэр түһэрэр үлэлэр  кыраапыгы тутуһан, сөптөөхтүк ыытыллан иһэллэр.  Былааннаммыт 65 эбийиэктэн 14 -дэ туттарылынна, аны салгыы  бу күннэргэ эбии 10 тутууга үлэ түмүктэниэҕэ.  Бу сыллааҕы былааны толоруохпут.

«Биир үөрүүлээх сонуну иһитиннэриэхпин баҕарабын -  биһиги тутааччыларбыт Докучаевскайдааҕы спорткомплекс (бассейыннаах) өрөмүөнүн бу сыл бүтүүтүгэр түмүктээн туттарыахтара. Былааннаммытынааҕар биир сыл эрдэлээн.

Докучаевскай куорат уопсастыбаннай сирдэрин сайыннарыыга улахан боҕомтобутун уурабыт. Дьон табыгастаахтык уонна куттала суох усулуобуйаҕа олороллоругар, эйэлээх олоххо  үөрүйэх үөскүүрүгэр бары кыаллары оҥорорго дьулуһабыт ”, -диэн Айсен Сергеевич үлэни көрөн сыаналаата уонна быйыл балаҕан ыйын 8 күнүгэр Донбаас ниэмэс-фашист сэриилэриттэн босхоломмута 81 сыла туолуутун бэлиэтиир тэрээһиннэр куорат өрөмүөннэммит пааркатын былаһааккатыгар ыытылларыгар эрэллээҕин биллэрдэ.   

Докучаевскай куорат уокуругун баһылыга Александр Качанов тыл этиитигэр Саха Сирин Ил Дарханыгар махтанан туран, өрөспүүбүлүкэ норуотугар сүгүрүйэбин диэтэ. “Саха Сирэ биһиги куораппытын 8 ый анараа өртүгэр шефтэһэр туһунан докумуоҥҥа илии баттаһан, үлэ саҕаламмыта. Бу кэм устата сөүмэр улахан кээмэйдээх өрөмүөннүүр-чөлүгэр түһэрэр үлэ оҥоһулунна уонна ыытылла турар. Үлэ барыта кыраапыгы эрдэлээн, бэрт хаачыстыбалаахтык толоруллар.

Саха Сирэ  65 эбийиэктэн 53 элбэх кыбартыыралаах олорор дьиэни өрөмүөннүүр. Ону таһынан уу-канализация ситимин, суоллары, үөрэхтээһин эбийиэктэрин чөлүгэр түһэрии  ыытыллар.  Еленовка бөһүөлэгэр МФЦ, полиция, баан, бибилэтиэкэ үлэлиир дьаһалта дьиэтин өрөмүөнэ түмүктэннэ.

Биһиги куораппытыгар  Саха Сирин быраастарын биригээдэлэрэ үлэлииллэр. Миэдиктэр суукканы эргиччи ыарыһахтары, травмаламмыт, бааһырбыт дьону эмтииллэр, быыһыыллар. Манна Дьокуускай куорат фотальомлогическай килииникэтин филиалын аһар былаан баар.  Саха Сирэ 4 смена устатыгар шефтээх куорат  400 оҕотун оҕо лааҕырдарыгар сынньаналларын тэрийдэ, киинэ көрдөрөр аныгы тэрили туруорда, ”-диэн Докучаевскай  баһылыга куорат олохтоохторун ааттарыттан дириҥ махталларын биллэрдэ .   

Хаартыскалар СӨ Ил Дарханын уонна Бырабыыталыстыбатын пресс-сулууспатын саайтыттан