СӨ Тутууну уонна дьиэни-уоту кэтээн көрөр судаарыстыбаннай управлениета (УГСЖН) элбэх кыбартыыралаах дьиэҕэ өрөмүөнү хайдах оҥоруохха сөбүн туһунан быһааран биэрдэ.
Уопсай мунньах ыытыллыахтаах
Дьиэлээх дьон ый ахсын хапытаалынай өрөмүөҥҥэ уонна Салайар хампаанньаҕа уопсай дьиэни (подъеһы, көрүдүөрү) көрөргө, ону өрөмүөннүүргэ усунуоһу төлүүллэр, ол кибитээнсийэҕэ тиэхиньиичэскэй хааччыйыы диэн суруллар. Өрөмүөн ити үбүнэн оҥоһуллуохтаах. Ол эрэн Салайар хампаанньаттан ону ирдэһэр киһи аҕыйах. Дьиҥэр, харчы төлүүр дьон булгуччу ирдэһиэхтээхтэр. Сорохтор подъезд ыһылла-тоҕулла сытарыгар харахтара үөрэнэн хаалар. Буолуохтааҕын курдук ылыналлар.
Элбэх кыбартыыралаах дьиэ подъеһын өрөмүөннүүргэ, бастатан туран, олохтоохтор уопсай мунньах ыытыахтаахтар. Арассыыйа дьиэҕэ-уокка кодексата уонна элбэх кыбартыыралаах дьиэни көрүү-истии быраабылата этэринэн, кинилэр уопсай мунньахха өрөмүөн оҥорорго туох-ханнык үлэ киирэрин быһаарыахтаахтар.
Дьиэҕэ-уокка көрүллэр сокуон быһыытынан, элбэх кыбартыылараах дьиэҕэ өрөмүөнү оҥорорго төһө харчыны хомуйары дьиэлээхтэр ханнык үлэни төһө чаастатык оҥоттороллоруттан көрөн ааҕаллар. Уопсай дьиэни (подъеһы, көрүдүөрү) өрөмүөннүүр кэккэ үлэ уонна өҥө көрүҥүн олохтоохтор, эбэтэр бэйэни салайыныы уоргана испииһэктиир.
Элбэх кыбартыыралаах дьиэҕэ өрөмүөнү оҥорорго олохтоохтор уопсай мунньахха тустаах үлэ хайдах үбүлэнэрин, өрөмүөн оҥорорго ким дуогабар түһэрсэрин, үлэни хонтуруоллуурун уонна бүппүтүн кэннэ аах оҥорон тутарын чуолкайдыыллар.
Быстах уонна хапытаалынай өрөмүөн диэн баар. Үгүс дьон ханнык үлэ хайа көрүҥҥэ киирэрин үчүгэйдик билбэт. Косметическай өрөмүөҥҥэ дьиэ ис-тас өттүн тупсаҕай көрүҥүн хааччыйыы, баар итэҕэстэри туоратыы, кырааска хоҥнон түспүтүн, муоста билиитэтэ алдьаммытын уларытыы киирэр.
Дьиэни Салайар хампаанньа, ТСЖ (дьиэни бас билээччилэр табаарыстыбалара) дьиэ туругун көрө сылдьан, туох оҥоһуллуохтааҕын бүтэрэн-оһорон, ситэрэн иһиэхтээх. Өрөмүөн үлэтин Салайар хампаанньа, эбэтэр дуогабарынан үлэлиир тустаах тэрилтэ оҥоруон сөп.
Быстах өрөмүөҥҥэ маннык үлэлэр киирэллэр:
- Дьиэ иҥнэри-хаҥнары түспүтүн туоратыы, сыбаайаны, эркини бөҕөргөтүү, вентиляция турбатын, боппуолдьаҕа баар хостору чөлүгэр түһэрии;
- Архитектурнай элэмиэннэри саҥардыы, эркин икки арда атан хаалбытын көннөрүү, үрэр дьөлөҕөстөрү бүөлээһин;
- Элбэх кыбартыыралаах дьиэ ис-тас эркинин, үрдүн кырааскалааһын;
- Түннүктэри, араамалары, тутаахтары саҥардыы;
- Подъезд өрөмүөнэ;
- Кыбартыыралар икки ардыларыгар баар истиэнэни бөҕөргөтүү;
- Хомунаалынай өҥөнү хааччыйарга носуоһу саҥардыы, тэстэр турбаны уларытыы, бүөлэммит, киртийбит турбаны ыраастааһын о.д.а.
- Уот ситимэ эргэрдэҕинэ, ону саҥардыы;
- Вентиляция тардыыта харгыһа суох үлэлиирин хааччыйыы;
- Муоста бүрүөһүнэ эргэрдэҕинэ, алдьаннаҕына саҥардан биэрии;
- Буоста дьааһыктарын, кирилиэс тутуһар сирин, лаампалары саҥардыы;
- Турбаны кырааскалааһын;
Өрөмүөн подьезд төһө эргэрбититтэн, алдьаммытыттан көрөн кэмигэр оҥоһуллуохтаах. Өскөтүн Салайар хампаанньа онно наадыйбат түгэнигэр, кини аатыгар сурук ыытыллар. Биирин кинилэргэ биэрэҕит, иккиһигэр сурук киирбит күнүн-дьылын, нүөмэрин бэлиэтэтэн, тэрилтэ бэчээтин, ылбыт үлэһит илии баттааһынын туруортаран баран бэйэҕитигэр хааллараҕыт.
Өскөтүн ол үрдүнэн Салайар хампаанньа өрөмүөнү оҥорботоҕуна, суруккутун СӨ Тутууну уонна дьиэни-уоту кэтээн көрөр судаарыстыбаннай управлениетыгар (УГСЖН) ыытаҕыт. Сайабылыанньаҕа пааспаргыт, ити дьиэҕэ олорор пропискаҕыт, дьиэҕитин бас билэр туһунан ыспыраапка (ЕГРН), ону таһынан, Салайар хампаанньаҕытыгар суруйбут суруккут, кинилэр эппиэттэрин куоппуйатын холбуу тутан бэриллэр.
Суругу Адрес электронной почты защищен от спам-ботов. Для просмотра адреса в вашем браузере должен быть включен Javascript. электроннай буочтаҕа, эбэтэр ОДЬКХ ГИС (http://dom.gosuslugi.ru), суругунан 677018, Дьокуускай куорат, Аммосов уул. 8 дьиэтигэр ыыталлар. Эбэтэр тэрилтэҕэ тиийэн, киирэр суруктар дьааһыктарыгар угуоххутун сөп. Аадырыска СӨ Тутууну уонна дьиэни-уоту кэтээн көрөр судаарыстыбаннай управлениетыгар (УГСЖН) диэн ыйаҕыт. Управление официальнай саайтыгар ЕСИА нөҥүө интэриниэт-приемнай үлэлиир.
Быстах өрөмүөн хапытаалынайтан туох уратылааҕый? Күннээҕи өрөмүөн дьиэ ис-тас көрүҥүн саҥардан, тупсаран биэрэр, ону Салайар хампаанньа, эбэтэр Дьиэни бас билээччилэр табаарыстыбалара (ТСЖ) оҥорор. Быстах өрөмүөн дьиэ үрдүн, подъеһын тупсарар, этиллибитин курдук эркин икки ардынааҕы дьөлөҕөстөрү бүөлүүр, алдьаммыт түннүктэри, ааны, кирилиэһи, пандуһу оҥорор.
Оттон хапытаалынай өрөмүөн элбэх кыбартыыралаах дьиэ олорорго эрэллээх уонна куттала суох буоларын хааччыйар. Бу үлэнэн эрэгийиэннээҕи оператор, СӨ Элбэх кыбартыыралаах дьиэлэр хапытаалынай өрөмүөннэрин ыытар пуонда дьарыктанар.
Хапытаалынай өрөмүөҥҥэ маннык үлэлэр киирэллэр:
- Дьиэ тас эркинин, атаҕын (сыбаайатын) өрөмүөннээн, тымныы салгын үрэр сирин сылытыы, балкуону, лоджияны, дьон сылдьар сиригэр (көрүдүөргэ) түннүктэри, балкуон ааннарын, таһырдьаттан киирэр ааны, кирилиэһи, кырыыһаны саҥардыы;
- Инженернэй ситими уу, уот, ититии, гаас турбатын уларытыы;
- Боппуолдьаны оҥоруу;
- Лииби саҥардыы, шаахтаны өрөмүөннээһин о.д.а. ханнык үлэ киирэрин СӨ Элбэх кыбартыыралаах дьиэлэр хапытаалынай өрөмүөннэрин ыытар пуонда саайтыгар киирэн көрүөххэ сөп.
Хапытаалынай өрөмүөн хаһан баҕардаҕыҥ аайы ыытыллыбат, тустаах пуонда саайтыгар дьиэҥ аадырыһын суруйдаххына, уочараккыт хаһыс сылга кэлэрин көрдөрөр. Дьиэҥ төһөнөн эргэ, оччонон уочаратыҥ эрдэ кэлэр эрээри, дьиэ сыбаайата алдьаннаҕына, иҥнэри түстэҕинэ, ыксаллаах быһыы-майгы тирээтэҕинэ, өрөмүөнү уталыппакка оҥороллор.
Салайар хампаанньа куотунар түгэнигэр
Түмүктээн эттэххэ, подъезд өрөмүөнэ 3-5 сылга биирдэ булгуччу оҥоһуллуохтаах. Тэлэбииһэринэн сонуннары көрдөххө, дойду киин куораттарыгар, Дьокуускайга даҕаны үрдэ сууллубут, эркинэ хайа барбыт, балкуона сууллан түспүт дьиэлэр бааллар. Өскөтүн өр кэмҥэ өрөмүөнү оҥорботоххо, дьиэни көрө-истэ сылдьыбатахха, турба тэстэн, уу тоҕуннаҕына, итиэннэ сир тоҥор, ирэр кэмигэр дьиэ хамсаан, ыксаллаах быһыы-майгы тахсыан сөп.
Салайар хампаанньаҕа өрөмүөнү оҥорор наадатын туһунан биирдэ-иккитэ эттэххэ, куруук харчы суоҕунан куотуналлар. Эбэтэр уопсай мунньах ыытыллыбатаҕа, дьиэни бас билээччилэр санааларын истибэккэ эрэ өрөмүөнү кыайан оҥорбоппут дииллэр. Биллэн турар, хас да подъеһынан этээс аайы сүүрэкэлии сылдьан, дьон сөбүлэҥин хомуйар уустук. Оттон мунньахха бары кэлбэттэр.
Өскөтүн подъезд түннүгэ алдьаннаҕына, муоста билиитэтэ, эркин эхайа бардаҕына, кырааската хоҥнон түстэҕинэ өрөмүөн хайаан даҕаны ыытыллыахтаах. Өрөмүөнү оҥорорго Салайар хампаанньа бэрэстэбиитэлин кытта дьиэ уопсай туругун, подъеһы, көрүдүөрү, киирэр ааны көрөн баран аах оҥоһуллар.
Сурук аан бастаан Салайар хампаанньа аатыгар ыытыллар, онно кыһаллыбатаҕына, СӨ Тутууну уонна дьиэни-уоту кэтээн көрөр судаарыстыбаннай управлениеҕа суруйуллар. Сорохтор борокуратуураҕа тиийэ үҥсэллэр.
Өрөмүөн хаачыстыбалаахтык оҥоһулларын туһугар олохтоохтор үлэ хас биирдии хардыытын кэтээн көрүөхтээхтэр. Үлэ бүппүтүн кэннэ подъеһы, көрүдүөрү, түннүгү сууйуохтаахтар, кырааска, килиэй, шпатлевка таммалаабытын сотуохтаахтар. Онтон дьиэлээхтэр уопсай мунньахха үлэ түмүгүн көрөн баран ону ылыналларын, эбэтэр баар итэҕэстэри туоратарга санааларын суругунан биллэриэхтээхтэр. Болдьоҕун ыйан туран. Онон өрөмүөҥҥүт ситиһиилээх, дьиэҕит киһи хараҕын үөрдэр тупсаҕай буоллун!
-
0
-
0
-
0
-
0
-
0
-
0
