Билигин эмиэ тиэргэннэригэр киирээт даҕаны, ханна эрэ куруорка, соҕуруу дойду санаторийын саадыгар сылдьар курдуккун. Хатыҥнар быыстарыгар ыскамыайкаҕа олорон, араас өҥнөөх сибэккилэри көрөн, санаам сэргэхсийдэ, сүргэм кытта көтөҕүлүннэ.
Маннык кэрэни ис сүрэхтэн оҥорбут талба талааннаах, көмүс илиилээх оҕуруотчукка махтана санаатым. Үлэтин таптыыра итинтэн көстөр. Сибэкки өҥүн табан, кэлбит киһини кустуктана оонньуур дьол туругар сатаан киллэрэр курдук оҥорбута, силигин ситэрбитэ дууһаҕын үөрдэр.
Аар хатыҥ быыһыгар сиэдэрэй сибэккилэрдээх тупсаҕай тиэргэннээх тэрилтэҕэ киһи эрэ үөрэ-көтө үлэлии кэлиэн курдук. Бу курдук хас биирдии тэрилтэ тэлгэһэтигэр үүнээйини олордоро буоллар, ону бүөбэйдээн, сыл-хонук аастаҕын аайы хатыҥнара улаатан, силигилии ситэн, сайын сиккиэр тыалга ааһар дьону сөрүүкэтэн суугунаһа туруохтара, оттон тэтэркэй сибэккилэр дьон сүрэҕин үөрдүөхтэрэ.
-
0
-
0
-
0
-
0
-
0
-
0
