Уопсастыба

Аны өрүс кытыла икки өттүттэн зоопарканы санатар бүтэй күрүө, ол нөҥүө айылҕа кэрэ көстүүтэ уруккутун курдук көстүбэт. Көҕөрдүү үлэтэ эһиил ыытыллыахтаах эрээри, бүтүн набережнай устун буордаах клумба биир-икки эрэ сиргэ баар, атына барыта аспаал.

Тардынарга турниктары туруорбуттар эрээри, ким даҕаны онно дьарыктаммат, чугаһаабат даҕаны. 202 түөлбэҕэ үксүн бэтэрээннэр, аҕа саастаах дьон олороллор, кинилэргэ анаммыт туох даҕаны суох. Урут хас хардыыҥ аайы саатар ыскамыайка баар этэ, билигин көбүс көнө суолунан көтүтэн иһэр самакааттаах киһи түҥнэри көппөтүн диэн кэннигин көрүнэ-көрүнэ хаамаҕын.

Арааһа, набережнай бырайыагын бэлэсипиэттээх уонна самакааттаах эдэр дьон оҥорбуттар быһыылаах дэһэллэр куорат олохтоохторо. Бары усулуобуйа кинилэргэ эрэ ананан оҥоһуллубут.

Набережнай устун хааман истэххинэ, Өрүс пуордун диэки киирэр даамба баар, онно хайыһар суолу аспааллаабакка хаалларан кэбиспиттэрэ быыл, кумах бурҕайа, үлтүркэй таас, бөх-сах ыһылла сытара көрүөххэ мөкү көстүүлээх.

Аны набережнай суолун кыйа массыынаны туруорар разметка бэлиэлэр уруһуйдаммыттар, онон дьон сынньана кэлэр сирэ улахан парковка курдук, сибиэһэй салгынынан тыыныам диэбитиҥ тимир көлөлөр чөмөхтөһөн турар гаастарын сытын сыттыыргар тиийэҕин. Дьиҥэр, набережнайга массыына киирэрин бобон, сатыы дьон хаамарыгар, сынньанарыгар уопсастыбаннай эйгэ тэриллибитэ буоллар ордук буолуо этэ.

Санкт Петербург, Сочи, Геленджик, Хабаровскай курдук улахан куораттарга набережнай ортотугар парковка оҥорон, массыыналарын онно туруорбаттар, тимир көлөлөрүн тэйиччи хаалларан баран набережнайга сатыы хааман киирэллэр. Муора, өрүс кытылыгар күөх үүнээйини, маһы, сибэккини өлгөмнүк үүннэрэн, ыскамыайкаҕа олорон дьон кэрэ көстүүнү көрөн дуоһуйарыгар усулуобуйа оҥороллор. Оттон биһиги куораппытыгар ону ситэ өйдөөбөттөрө хомолтолоох.

Дьокуускай куорат сөтүөлүүр сирин үөһээ өттүн аспааллаабыттар, сатыы киһи хаамар суолун ортотугар хомуллар сайыҥҥы дьиэлэри туруоран кэбиспиттэрэ табыгаһа суох курдук. Пляжка баар эргэ быраҕыллыбыт сарайдары көтүрбэтэхтэр.

Оҕолорго былаһаакка оҥорбуттар даҕаны, сиртэн нэһиилэ тэйэр намыһах хачыалга 4-5 эрэ саастаах оҕо олорууһу,  улахаттарга туох даҕаны суох.

Набережнайга, сөтүөлүүр сиргэ бүрүөһүннээх тутууну туруорбуттар эрээри, үрдэ көҥдөй, ардах курдары түһүөҕэ, күнтэн да хаххаланыаҥ суоҕа.

Онон өрүспүт кытылын өрөмүөнүн сүүрбэччэ сыл күүттүбүт даҕаны, бырайыага дьоҥҥо өйдөммөт, табыгаһа суох курдук оҥоһуллубут.

Өлүөнэ эбэ кытылын өрөмүөнүн оҥорор Дьокуускай куорат «Главстрой» тэрилтэтин дириэктэрэ Алексей Варламов: «Биһиги оҥоһуллубут бырайыагынан үлэлиибит, ону тустаах сулууспалар, эспэртиисэ бигэргэппитэ. Ыскамыайкалары туруоруохпут, кытылы саҥардар үлэ өссө түмүктэнэ илик», — диэн эппиэттээтэ.

Санатан эттэххэ, Роман Дмитриев аатынан набережнайы тупсаран оҥорорго 369,7 мөл. солк. көрүллүбүтэ.

Ааптар хаартыскаҕа түһэриилэрэ.