Бэлиэ түгэҥҥэ хотугу уһук сир оройуоннааҕы Сэбиэтин дьокутааттара, тэрилтэлэр, учреждениелар салайааччылара, Аллараа Халыма уопсастыбаннаһын бэрэстэбиитэллэрэ кыттан, саҥа баһылыкка үтүө санааларын, алгыстарын анаатылар. Ол курдук үөрүүлээх түгэни ырыа-үҥкүү кэлэктииптэрэ саҕалаан, салгыы оройуоннааҕы ТИК бэрэссэдээтэлэ Надежда Мороз балаҕан ыйын 8 күнүгэр ыытыллыбыт оройуон баһылыгын быыбарын түмүгүн иһитиннэрдэ уонна саҥа баһылык эрэгэстэрээссийэлэммитин туһунан дастабырыанньаны туттарда. Ол кэннэ Ярослав Бандеров Аллараа Халыма оройуонун Устаабыгар уҥа илиитин ууран туран, бар дьонугар-сэргэтигэр Андаҕарын эттэ.
Салгыы, чулуу табаһыттардаах, балыксаттардаах, үтүө-мааны үлэһиттэрдээх Аллараа Халыма дьокутааттарын оройуоннааҕы Сэбиэтин бэрэссэдээтэлэ Сергей Мильман баһылык бэлиэтин туттарда, ыраах Дьокуускайтан кэлбит СӨ Аартыканы сайыннарыыга уонна Хотугу сир норуоттарын дьыалаларыгар миниистирэ Владимир Черноградскай Ил Дархан Айсен Николаев эҕэрдэ суругун ааҕан иһитиннэрдэ уонна кини ыыппыт бэлэҕин туттарда.
Үөрүүлээх тэрээһин кэмигэр ону кытта РФ Федеральнай мунньаҕын(Сэбиэтин) сенатора Сахамин Афанасьев, Судаарыстыбаннай Дуума дьокутаата Галина Данчикова, Ил Түмэн бэрэссэдээтэлэ Алексей Еремеев уонна Орто Халыма улууһун баһылыга Иван Лаптев ыыппыт эҕэрдэлэрин ааҕан иһитиннэрдилэр.
Биллэрин курдук, Ярослав Бандеров ааспыт быыбарга 53,64 % куолаһы ылан, быыбарга туруоруммут Альбина Винокурованы (26,26% ылбыта), Арсентий Цалкону (16,49%) кыайан баһылыгынан талыллыбыта.
Хаартыскалар Улусмедиа саайтыттан ылылыннылар
-
0
-
0
-
0
-
0
-
0
-
0
