Алексей Ильич өссө икки сыллааҕыта Чөркөөххө Былатыан Ойуунускай аатынан Судаарыстыбаннас түмэлигэр бэйэтинэн кэлэн, дьиэ-уот туругун көрбүтэ, мунньаҕы ыыппыта. Бу мунньах сүрүн быһаарыытынан, судаарыстыбаннас музейыгар биир тиһиктээх өрөмүөн үлэтэ ыытыллара наадалааҕа биллибитэ. Бу сылларга Ем. Ярославскай аатынан бас түмэл уонна судаарыстыбаннас түмэллэрин салайааччылара, үлэһиттэрэ бырайыак тосхоло оҥоһуллуутугар тэҥҥэ кыттыыны ыллылар.
Мунньахха П.А. Ойуунускай аатынан СӨ судаарыстыбаннаһын түмэлигэр хапытаалынай өрөмүөнү ыытыы туһунан иһитиннэриини СӨ култуураҕа уонна духуобунай сайдыыга миниистирэ А.И.Ноев оҥордо. Кини бэлиэтээн эппитинэн, түмэлгэ өрөмүөн үлэтэ икки түһүмэҕинэн барыаҕа. Бастаан үлэ дьиэ акылаатыттан, толору хааччыллыытын үлэтиттэн саҕаланыаҕа. Иккис түһүмэҕэ – түмэл ис барааныгар реэкспозиция оҥоһуллуута. Бу бастакы түһүмэх өрөмүөҥҥэ федеральнай бюджеттан 18 мөл. тахса суума көрүллүбүт. Онон Саҥа дьыл кэнниттэн тутааччыга тендер биллэриллэн үлэ саҕаланыахтаах. Спикер Алексей Еремеев бэлиэтээн эппитинэн, тендер, куонкурус түмүгэ олунньу ый ортотугар диэри биллэн, суол сабыллыар диэри сүрүн матырыйааллар аҕалыллыахтарын наадатын, оччотугар эрэ улахан өрөмүөн үлэтэ кэмигэр бүтэр кыахтанарын туһунан тоһоҕолоон эттэ:
“Бу улахан өрөмүөн үлэтин Былатыан Ойуунускай кимин билэр, сахаларга кини суолтатын өйдүүр бэдэрээччит тутара буоллар. Эһиил бу кэмҥэ бастакы түһүмэх өрөмүөн үлэтэ бүтэн, иккис – реэкспозицияҕа үп көрүүтүн мунньаҕа ыытыллыахтаах”.
Иккис боппуруоһунан, саҥардыллыбыт түмэлгэ сүрүн экспозиция, дизайн өттүнэн хайдах уларыйыахтааҕын Ем.Ярославскай аатынан бас түмэлбит дириэктэрин солбуйааччы А.М. Ховров иһитиннэрдэ. Арай дизайн-бырайыагы көрөн олордоххо, түмэлбит киһи билбэт гына уларыйан, аныгы кэм көрөөччүтүн ирдэбилигэр эппиэттиир гына сандаарыыһы! Манна уһуйаан кырачаан оҕолоруттан саҕалаан бары киирэн бэйэлэригэр сөптөөх иһитиннэриини ылар кыахтаналлар.
Алексей Ильич Еремеев, мунньах түмүгэр, бу бырайыакка туох киирбэтэ, ситэ учуоттаммата диэн ыйытыытыгар: “Бары өттүнэн учуоттуу сатаатыбыт” , — диэн буолла. Онон Алексей Ильич бу улахан өрөмүөн үлэтигэр А.М.Ховровы бары өттүнэн эппиэтинэс ылаҕын диэтэ.
Бүгүҥҥү мунньах биир үтүө илдьитинэн Таатта кэккэ түмэллэригэр өрөмүөн үлэтэ ыытылларыгар үп-харчы көстүөх курдук буолбута эрэли үөскэттэ. Үтүө саҕалааһын батыһыннарыылаах диэбиттии, Улуу Былатыан Ойуунускай судаарыстыбаннаһын түмэлигэр улахан өрөмүөн тигинэччи барарын, үлэ түмүгүн эрэнэ күүтэбит.
Ярославскай аатынан судаарыстыбаннай түмэл саайтыттан
Хаартыскалар Ил Түмэн пресс-сулууспатын саайтыттан
-
0
-
0
-
0
-
0
-
0
-
0
